உங்களுக்குத் தெரியுமா ?
வேரித்தாஸ் நிகழ்ச்சிகளை டிஜிட்டல் தொழில் நுட்பத்தில் 24 மணிநேரமும், 7 நாட்களிலும் இணையத்தளத்திலும் அன்ராய்டு மொபைலிலும் கேட்கலாம். அன்ராய்டு மொபைல் பயன்பாட்டினைப் பதிவிறக்கம் செய்ய RVA MOBILEஎன டைப் செய்யவும்

இலங்கை செய்திகள்

மேலும் இருவர் அமைச்சர்களாக பதவியேற்பு!
ஐக்கிய மக்கள் சுதந்திர முன்னணியின் பொதுச் செயலாளர் மஹிந்த அமரவீர மஹாவலி இராஜாங்க அமைச்சராக பதவிப்பிரமாணம் செய்துக்கொண்டுள்னார். இதேவேளை லசந்த அழகியவண்ண நிதி மற்றும் வெகுசன ஊடக பிரதியமைச்சராக பதவிப்பிரமாணம் செய்துக்கொண்டுள்ளார். இன்று முற்பகல் நான்கு இராாஜாங்க அமைச்சர்கள் மற்றும் மூன்று பிரதி அமைச்சர்கள் ஜனாதிபதி மைத்திரிபால சிறிசேன தலைமையில் பதிவிப்பிலமாணம் செய்துக்கொண்டுள்ளமை குறிப்பிடத்தக்கது.
See More
இது மனிதநேயத்தோடு செயற்படவேண்டிய நேரம்: குமர குருபரன்
நாட்டிலுள்ள அனைத்து மக்களும் மனிதநேயத்தோடு செயற்படவேண்டிய நேரம் இது என குமர குருபரன் தெரிவித்துள்ளார். அனர்த்தத்தில் உயிரிழந்தவர்களுக்காக அஞ்சலி செலுத்தும் நிகழ்வு இன்று கொழும்பு கோட்டையில் ஏற்பாடு செய்யப்பட்டிருந்தது. இந்த நிகழ்வில், கலந்து கொண்டு கருத்து தெரிவித்த போதே அவர் இவ்வாறு கூறினார். இதன்போது தொடர்ந்தும் தெரிவிக்கையில், பல உயிர்களை, உடமைகளை இழந்திருக்கிறோம் அவர்களை இந்த நேரத்தில் மனித நேயத்துடன் நினைவு கூரவேண்டும் எனவும் குறிப்பிட்டுள்ளார்.
See More
மண்சரிவு அபாய எச்சரிக்கை 24 மணிநேரங்களுக்கு நீடிக்கப்பட்டது
மண்சரிவு தொடர்பான அபாய எச்சரிக்கையை மேலும் 24 மணிநேரங்களுக்கு நீடித்துள்ளதாக கட்டடவியல் ஆராய்ச்சி நிறுவனம் எச்சரிக்கை அறிவித்தல் விடுத்துள்ளது. இலங்கையில் நிலவிய அனர்த்த காலநிலை காரணமாக கடந்த நாட்களில் மண்சரிவு தொடர்பான அபாய எச்சரிக்கை ஏழு மாவட்டங்களில் வசிக்கும் மக்களை இலக்காகக் கொண்டு வெளியிடப்பட்டிருந்தது. கொழும்பு, கம்பஹா, களுத்துறை, காலி, ஹம்பாந்தோட்டை, மாத்தறை, கேகாலை, இரத்தினபுரி ஆகிய குறித்த மாவட்டங்களில் தற்போது வெள்ள அபாயம் நீங்கி, மழைவீழ்ச்சியும் குறைந்துள்ள போதிலும் மண் சரிவு அபாயம் நீடிப்பதாக தேசிய கட்டடவியல் ஆராய்ச்சி நிறுவனம் அறிவித்துள்ளது. எனவே இன்று பிற்பகல் ஒருமணி தொடக்கம் எதிர்வரும் 24 மணிநேரத்துக்கு மேற்குறித்த ஏழு மாவட்டங்களில் மண்சரிவு அபாயம் ஏற்படுவதற்கான வாய்ப்பு இருப்பதால் பொதுமக்களை அவதானமாக இருந்து கொள்ளுமாறு அறிவுறுத்தப்பட்டுள்ளது. இதன்பிரகாரம் மண்சரிவு அபாயம் குறித்த எச்சரிக்கை விடுக்கப்பட்டுள்ள பிரதேசங்கள் கீழ்வருமாறு.. இரத்தினபுரி- இரத்தினபுரி,பெல்மதுளை, குருவிட, எஹலியகொட, கிரியெல்ல, இம்புல்பே, அயகம, கஹவத்த, கலவான, கொலன்ன மற்றும் நிவித்திகல பிரதேச செயலகப்பிரிவுகள் கேகாலை- புளத் கொஹுப்பிட்டிய, தெரணியகலை, எட்டியாந்தோட்டை, தெஹியோவிற்ற பிரதேச செயலகப் பிரிவுகள் காலி- பத்தேகம, யக்கலமுல்ல, நெளுவை, தவளம, நியாகம, நியாகொட பிரதேச செயலகப் பிரிவுகள் களுத்துறை - புளத்சிங்கள, அகலவத்தை, வலல்லாவிட, பதுரலிய பிரதேச செயலகப் பிரிவுகள் மாத்தறை- கொடபொல, பஸ்கொட, பிட்டபெத்தர மற்றும் முலட்டியன பிரதேச செயலகப் பிரிவுகள் ஹம்பாந்தோட்டை- வலஸ்முல்லை மற்றும் கட்டுவன பிரதேச செயலகப் பிரிவுகள் நுவரெலியா- அம்பகமுவ கோரளே பிரதேச செயலகப்பிரிவு
See More
இலங்கைக்கு உதவி வழங்க 44 நாடுகள் முன்வருகை
இயற்கை அனர்த்தங்களினால் பாதிக்கப்பட்ட மக்களின் வாழ்வாதாரத்தை மீளக் கட்டியெழுப்புவதற்காக 44 சர்வதேச நாடுகள் இலங்கைக்கு உதவ முன்வந்துள்ளதாக அரசாங்கம் தெரிவிக்கின்றது. இவற்றில் 30 நாடுகளின் உதவிகள் விரைவாக இலங்கைக்கு கிடைக்கவுள்ளதுடன் வெள்ளம் மண் சரிவு உட்பட இயற்கை அனர்த்தங்களினால் பாதிக்கப்பட்ட அனைவருக்கும் இந்த நிதியில் நேரடியாகவே வீடுகளை நிர்மாணித்து வழங்க ஜனாதிபதி மைத்திரிபால சிறிசேன தீர்மானித்துள்ளதாக துறைமுக கப்பல்துறை அபிவிருத்தி அமைச்சர் மஹிந்த சமரசிங்க தெரிவித்தார். நேற்று இடம்பெற்ற அமைச்சரவையில் இது தொடர்பில் விரிவாக ஆராயப்பட்டதாகக் குறிப்பிட்ட அமைச்சர் சர்வதேச நாடுகளிலிருந்து கிடைக்கும் உதவியுடன் தற்போதைய இயற்கை அனர்த்தங்கள் உட்பட மீதொட்டமுல்ல, கேகாலை அனர்த்தங்கள், சாலாவ அனர்த்தம் ஆகியவற்றில் பாதிக்கப்பட்டவர்களுக்கும் வீடுகளை நிர்மாணித்து வழங்க அரசாங்கம் நடவடிக்கை எடுக்கும் என்றும் அமைச்சர் தெரிவித்தார். நேற்று ஸ்ரீலங்கா சுதந்திரக் கட்சியின் தலைமையகத்தில் இடம்பெற்ற விசேட செய்தியாளர் மாநாட்டின் போதே அமைச்சர் அரசாங்கம் எடுத்துள்ள இந்த முடிவை அறிவித்தார். இது தொடர்பில் மேலும் தெரிவித்த அமைச்சர், 44 சர்வதேச நாடுகள் இலங்கைக்கு உதவ முன்வந்துள்ளதாக நேற்றைய தினம் வெளிவிவகார அமைச்சர் ரவி கருணாநாயக்க அமைச்சரவைக்கு அறிவித்திருந்தார். அதில் 30 நாடுகள் உடனடியாக தமது உதவிகளை வழங்கும் என்றும் அவர் தெரிவித்திருந்தார். இதற்கிணங்க நேற்று ஜனாதிபதியின் தலைமையில் இடம்பெற்ற அமைச்சரவையில் இவ்வாறு வெளிநாடுகளிலிருந்து கிடைக்கும் நிதியுதவிகளைக் கொண்டு அண்மைக் காலங்களில் இடம்பெற்ற இயற்கை அனரத்தங்களில் பாதிக்கப்பட்ட சகலருக்கும் வீடுகள் நிர்மாணித்து வழங்கும் தீர்மானத்தை ஜனாதிபதி முன்வைத்தார். இதேவேளை, கடந்த காலங்களில் இயற்கை அனர்த்தங்களின் போது மக்களுக்கு வழங்கப்பட்ட வீடுகள் மீண்டும் அழிவுகளுக்குள்ளாகியுள்ளன.இதனால் பாதிக்கப்படாத இடங்களில் வீடுகளை நிர்மாணித்து வழங்க அரசாங்கம் தீர்மானித்துள்ளது. இதற்கென பொருத்தமானதும் இயற்கை அனர்த்தங்களில் பாதிக்கப்படாததுமான இடங்கள் தெரிவு செய்யப்பட்டே வீடுகள் அமைக்கப்படவுள்ளன.வீடுகளை நிர்மாணித்தல் தொடர்பில் முக்கிய விடயங்களை உள்ளடக்கிய அரசாங்க சுற்றறிக்கை இன்னும் 2, 3, தினங்களில் வெளியிடப்படும், அத்துடன் பாதிக்கப்பட்ட மக்களுக்கு உச்ச அளவில் நிவாரணங்களை வழங்கவும் நடவடிக்கை எடுக்கப்படும் என்றும் அமைச்சர் மேலும் தெரிவித்தார்.
See More
இன, மத வேறுபாடுகளின்றி பாதிக்கப்பட்ட உறவுகளுக்கு உதவிக்கரம் நீட்டுங்கள்
இன, மத வேறுபாடுகளின்றி பாதிக்கப்பட்ட மக்களுக்கு உதவ முன்வருமாறு மட்டக்களப்பு மாவட்ட வேலையற்ற பட்டதாரிகள் வேண்டுகோள் விடுத்துள்ளனர். மட்டக்களப்பு மாவட்ட வேலையற்ற பட்டதாரிகள் தொழில் உரிமைவேண்டி காந்தி பூங்கா முன்பாக மேற்கொண்டுவரும் சத்தியாக்கிரக போராட்டம் 100ஆவது நாளாக இன்றும் நடைபெற்று வருகின்றது. இதுவரையில் எந்தவித உறுதிமொழிகளும் வழங்கப்படாத நிலையில் தொடர்ந்து வேலையற்ற பட்டதாரிகள் போராட்டங்களை நடத்திவருகின்றனர். இந்த நிலையில் தெற்கில் இடம்பெற்ற அனர்த்தங்களில் உயிர் நீத்தவர்களுக்கு அஞ்சலி செலுத்தும் வகையிலான நிகழ்வு இன்று பிற்பகல் நடைபெற்றது. மட்டக்களப்பு மாவட்ட வேலையற்ற பட்டதாரிகள் சங்கத்தின் தலைவர் ரி.கிஷாந்த் தலைமையில் இந்த நிகழ்வு சிறப்பாக நடைபெற்றது. கைகளில் மெழுகு வர்த்தியை ஏந்தியவாறு அஞ்சலி நிகழ்வுகளில் பட்டதாரிகள் பங்குபற்றியதுடன் மெழுவர்த்திகளைக்கொண்டு இறந்தவர்களின் ஆத்மா சாந்தியடைய பிரார்த்தனையும் செய்யப்பட்டது. அத்துடன் அனர்த்தங்களில் பாதிக்கப்பட்ட மக்கள் மீண்டுவந்து இயல்பு வாழ்க்கைக்கு திரும்பவேண்டும் எனவும் இங்கு பிரார்த்தனை செய்யப்பட்டது.
See More
அனர்த்த நிவாரணங்களுக்கான வெளிநாட்டு நிதியுதவிகளில் வீடமைப்புத்திட்டங்கள்
இயற்கை அனர்த்தங்கள் காரணமாக பாதிக்கப்பட்டுள்ள இலங்கைக்கு கிடைக்கவுள்ள வெளிநாட்டு நிதியுதவிகளைக் கொண்டு வீடமைப்புத்திட்டங்களை அமைக்கவுள்ளதாக அறிவிக்கப்பட்டுள்ளது. ஸ்ரீலங்கா சுதந்திரக் கட்சியின் தலைமையகத்தில் இன்று நடைபெற்ற செய்தியாளர் சந்திப்பின்போது துறைமுக மற்றும் கப்பல் போக்குவரத்து அமைச்சர் மஹிந்த சமரசிங்க இத்தகவலை வெளியிட்டுள்ளார். அனர்த்தங்களினால் பாதிக்கப்பட்ட மக்களுக்கு உதவுமாறு அரசாங்கம் விடுத்த வேண்டுகோளை ஏற்றுக்கொண்டுள்ள சர்வதேச நாடுகள் பலவும் இலங்கைக்கு உதவிகள் வழங்க முன்வந்துள்ளன. தற்போதைக்கு 44 நாடுகள் நிதியுதவிகளை நிவாரணமாக வழங்க இணக்கம் தெரிவித்துள்ளதுடன், இவற்றில் 30 நாடுகள் நிதியுதவிகளை ஏற்கனவே வழங்கிவிட்டன. இந்நிலையில் இவ்வாறு கிடைக்கப்பெறும் அனைத்து நிதியுதவிகளையும் பயன்படுத்தி அனர்த்தங்களினால் பாதிக்கப்பட்ட மக்களுக்கான வீடமைப்புத்திட்டங்களை முன்னெடுக்க இன்றைய அமைச்சரவைக் கூட்டத்தின் போது தீர்மானிக்கப்பட்டுள்ளது. மீதொட்டமுல்ல குப்பை மலை, சாலாவ இராணுவக் கிடங்கு வெடிப்பு போன்ற அனர்த்தங்களினால் பாதிக்கப்பட்ட மக்களுக்கும் இந்த வீடமைப்புத்திட்டங்களின் மூலம் வீடுகள் பெற்றுக் கொடுக்கப்படும் என்றும் அமைச்சர் மஹிந்த சமரசிங்க மேலும் தெரிவித்துள்ளமை குறிப்பிடத்தக்கது.
See More
சுதந்திரக் கட்சியின் அமைச்சரவை இணைப்பேச்சாளராக தயாசிறி ஜயசேகர நியமனம்
அமைச்சரவை இணைப்பேச்சாளராக அமைச்சர் தயாசிறி ஜயசேகர நியமிக்கப்பட்டுள்ளதாக ஸ்ரீ லங்கா சுதந்திரக் கட்சி தெரிவித்துள்ளது. அமைச்சரான பீல்ட் மார்ஷல் சரத் பொன்சேகாவுக்கு பாதுகாப்புத்துறை சார் உயர் பதவி ஒன்று ஜனாதிபதியால் வழங்கப்படவுள்ளதாக அமைச்சரவை இணை பேச்சாளரான ராஜித சேனாரட்ன அண்மையில் அமைச்சரவை தீர்மானங்களை அறிவிக்கும் ஊடக சந்திப்பொன்றில் குறிப்பிட்டார். அத்துடன், ஆர்ப்பாட்டங்கள் மற்றும் போராட்டங்களை கட்டுப்படுத்தும் வகையில் அவரது தலைமையில் இயங்கும் பாதுகாப்பு பிரிவு செயற்படும் என்றும் அவர் குறிப்பிட்டிருந்தார். அமைச்சரின் இந்தக் கருத்தால் ஆளுந்தரப்பு அமைச்சர்களிடையே கருத்து முரண்பாடு தோன்றியது. இதையடுத்து, ஸ்ரீ லங்கா சுதந்திரக் கட்சியின் சார்பில் அமைச்சரவை இணைப் பேச்சாளர் ஒருவரை நியமிக்க வேண்டும் என அக்கட்சியின் சிரேஷ்ட அமைச்சர்கள் ஜனாதிபதியிடம் கோரிக்கை விடுத்திருந்தனர். இந்த நிலையில், அமைச்சரவை இணைப் பேச்சாளராக ஸ்ரீ லங்கா சுதந்திரக் கட்சியின் அமைச்சரான தயாசிறி ஜயசேகர நியமிக்கப்பட்டுள்ளதாக ஸ்ரீ லங்கா சுதந்திரக் கட்சி தெரிவித்துள்ளது. இதேவேளை, அமைச்சர்களான ராஜித சேனாரட்ன மற்றும் கயந்த கருணாதிலக ஆகியோர் அமைச்சரவை இணைப் பேச்சாளர்களாக செயற்பட்டு வருகின்றமை குறிப்பிடத்தக்கது.
See More
வலுப்பெறும் ‘மோரா’ புயல்... பலியானவர்களின் எண்ணிக்கை 201ஆக அதிகரிப்பு!
நாட்டில் நிலவும் சீரற்ற காலநிலை காரணமாக உயிரிழந்தவர்களின் எண்ணிக்கை 201ஆக அதிகரித்துள்ளதாக அனர்த்த முகாமைத்துவ மத்திய நிலையம் தெரிவித்துள்ளது. இலங்கையின் தென்மேற்கு பகுதியில் கடந்த 25ஆம் திகதி முதல் தொடர்ந்து கனமழை பெய்து வருகிறது. கடந்த 40 ஆண்டுகளில் இல்லாத அளவுக்கு பெய்து வரும் இந்த மழையால் வெள்ளப்பெருக்கும், பல இடங்களில் நிலச்சரிவும் ஏற்பட்டு உள்ளது. இதனால் சுமார் 5 இலட்சம் மக்கள் கடுமையாக பாதிக்கப்பட்டு உள்ளனர். நிலச்சரிவால் மண்ணுக்குள் புதைந்து கிடந்த பலரின் உடல்கள் நேற்றும் மீட்கப்பட்டன. இதன் மூலம் உயிரிழந்தவர்களின் எண்ணிக்கை 201 ஆக உயர்ந்துள்ளதாக தெரிவிக்கப்பட்டுள்ளது. மழை, வெள்ளத்தில் சிக்கி உள்ள மக்களை மீட்கும் பணியிலும், நிவாரண உதவிகள் வழங்குவதிலும் இலங்கை முப்படையினர் மும்முரமாக ஈடுபட்டுள்ளனர். நேற்று இந்த பணியில் ஈடுபட்டிருந்த விமானப்படை ஹெலிகாப்டர் ஒன்று மோசமான வானிலை காரணமாக விழுந்து நொறுங்கியது. எனினும் அதில் இருந்த விமானி அதிர்ஷ்டவசமாக தப்பினார். வங்கக்கடலில் உருவான காற்றழுத்த தாழ்வு மண்டலம் புயலாக (மோரா) உருவாகி இருப்பதால், அங்கு மேலும் 2 நாட்களுக்கு கனமழை பெய்யும் என வானிலை ஆய்வு மையம் அறிவித்துள்ளது. இது பாதிக்கப்பட்ட மக்களுக்கு பேரிடியாக அமைந்துள்ளது. இயற்கை பேரிடரில் சிக்கியுள்ள இலங்கைக்கு உதவிக்கரம் நீட்ட சீனா முன்வந்துள்ளது. 22 இலட்சம் டாலர் மதிப்புள்ள நிவாரண பொருட்கள் விரைவில் இலங்கைக்கு வழங்கப்படும் என சீன அரசு அறிவித்து உள்ளது. இதற்கிடையே நிவாரண பொருட்கள் மற்றும் மீட்புக்குழுவினரை ஏற்றிச்சென்ற இந்தியாவின் 2வது போர்க்கப்பலான ஐ.என்.எஸ்.ஷர்துல், நேற்று முன்தினம் கொழும்பு வந்திருந்தது. வங்கக்கடலில் அந்தமான் அருகே உருவான காற்றழுத்தத் தாழ்வு நிலை, தற்போது வலுவடைந்து அதி தீவிர புயலாக மாறி வருகிறது. ‘மோரா’ எனப் பயரிடப்பட்ட இந்தப் புயல் மேற்குவங்கத்துக்குத் தென்கிழக்குக் கடலில் மையம் கொண்டுள்ளது. இந்தப் புயலால் வங்கதேசம், ஒடிசா, அருணாச்சல்பிரதேசம் மற்றும் வடகிழக்கு மாநிலப் பகுதிகளில் தீவிரமாக மழை பெய்யும். வங்கக்கடலைக் கடக்கும் இந்தப் புயலால் தமிழகத்துக்கு எவ்வித பாதிப்பும் ஏற்படாது என்று அறிவிக்கப்பட்டுள்ளது. இதனால், வானிலையில் எவ்வித மாற்றமுமின்றி தமிழகத்தில் வெப்பம் தொடர்ந்து நிலவும் என்றும் தெரிவிக்கப்பட்டுள்ளது. வங்கக்கடலில் கடந்து போவதால் கடல் கொந்தளிப்புடன் காணப்படும் என்பதால் வங்கக்கரையிலுள்ள துறைமுகங்களில் புயல் எச்சரிக்கைக் கூண்டுகள் ஏற்றப்பட்டுள்ளன.
See More
தெற்கிலோ மழையினால் பெரும் பாதிப்பு! வடக்கிலோ மழையின்றி பாதிப்பு!
தென் மாகாணத்தில் கடுமையான மழை வெள்ளம் ஏற்பட்டு அழிவுகள் இடம்பெற்று வரும் நிலையில் வடக்கு மாகாணத்தில் கடுமையான வறட்சி நிலைமை நீடித்து வருகின்றது. வடக்கிற்கு சில மாதங்களாக மழை கிடைக்காத காரணத்தினால் 130,243 குடும்பங்களைச் சேர்ந்த 440,531 பேர் பாதிக்கப்பட்டுள்ளதாக மாவட்ட அனர்த்த முகாமைத்துவ நிறுவனம் தெரிவித்துள்ளது. தென்மேல் மற்றும் சப்ரகமுவ மாகாணங்களில் மழை வெள்ளத்தினால் ஐந்து இலட்சம் பேர் வரையில் பாதிக்கப்பட்டுள்ளனர். இந்த நிலையில் வடக்கில் மழையின்றி 670 கிராம சேவைப் பிரிவுகளில் கடும் பாதிப்பு ஏற்பட்டுள்ளது. வறட்சியினால் பாதிக்கப்பட்ட மக்களுக்கு மாவட்டச் செயலகம் மற்றும் பிரதேச செயலகம் ஆகியவற்றின் ஊடாக நீரை விநியோகம் செய்ய நடவடிக்கை எடுக்கப்பட்டு வருவதாகத் தெரிவிக்கப்படுகிறது. எதிர்வரும் நாட்களிலும் மழை பெய்யாவிட்டால் வறட்சியினால் பாதிக்கப்பட்ட மக்களின் எண்ணிக்கை மேலும் உயர்வடையும் என தெரிவிக்கப்படுகிறது.
See More
பாரிய வெள்ளத்தை பார்வையிட சென்ற 18 பேர் பரிதாபமாக மரணம்
வெள்ளத்தினால் பாதிக்கப்பட்டுள்ள பகுதிகளை பார்வையிட சென்ற 18 பேர் இதுவரையில் உயிரிழந்துள்ளதாக அமைச்சர் வஜிர அபேவர்தன தெரிவித்துள்ளார். இவ்வாறான ஆபத்தான நிலைமைகளில் பாதிக்கப்பட்ட பகுதிகளை பார்வையிடுவதற்கு செல்வதனால் ஏற்படும் மரணங்களை தவிர்க்குமாறு அமைச்சர், பொது மக்களிடம் கேட்டுக் கொண்டுள்ளார். “நான் பத்தேகம பகுதிக்கு சென்ற சந்தர்ப்பத்தில், எச்சரிக்கை விடுக்கப்பட்ட பாதிக்கப்பட்ட பகுதிகளுக்கு பலர் செல்வதனை அவதானித்தேன். அவர்கள் தங்கள் பிள்ளைகளை கூட அவ்விடத்திற்கு அழைத்து சென்றிருந்தனர். இவ்வாறான நடவடிக்கையினை மக்கள் முற்றாக தவிர்த்துக் கொள்ள வேண்டும் என அமைச்சர் கேட்டுக் கொண்டுள்ளார்.
See More