உங்களுக்குத் தெரியுமா ?
வேரித்தாஸ் நிகழ்ச்சிகளை டிஜிட்டல் தொழில் நுட்பத்தில் 24 மணிநேரமும், 7 நாட்களிலும் இணையத்தளத்திலும் அன்ராய்டு மொபைலிலும் கேட்கலாம். அன்ராய்டு மொபைல் பயன்பாட்டினைப் பதிவிறக்கம் செய்ய RVA MOBILEஎன டைப் செய்யவும்

திருச்சபை செய்திகள்

மிலான் “வெள்ளை வீடுகள்” குடியிருப்புப் பகுதியில் திருத்தந்தை
மார்ச் 25, இச்சனிக்கிழமை, கிறிஸ்து பிறப்பு அறிவிப்பு விழா. இறைவார்த்தை உயிருள்ளது, வலிமை மிக்கது. இதயங்களில் மனமாற்றத்தை ஏற்படுத்தும் சக்தி வாய்ந்தது என்ற டுவிட்டர் செய்தியை இந்நாளில் வெளியிட்டார் திருத்தந்தை. இந்நாளன்று, திருத்தந்தை பிரான்சிஸ் அவர்கள், உலகின் மிகப் பெரிய மறைமாவட்டமான மிலான் உயர்மறைமாவட்டத்திற்கு ஒருநாள் மேய்ப்புப்பணி பயணத்தை மேற்கொண்டார். காலை 7.10 மணியளவில், உரோம் ஃபியூமிச்சினோ விமான நிலையத்திலிருந்து புறப்பட்ட திருத்தந்தை, காலை 8.15 மணிக்கு, மிலான் லினாத்தே விமான நிலையத்தை அடைந்தார். திருத்தந்தையை வரவேற்கும் அடையாளமாக, அந்நேரத்தில், மிலான் உயர்மறைமாவட்டத்தைச் சார்ந்த 1,107 பங்குகளில் அமைந்துள்ள, பங்கு ஆலயங்கள், சிற்றாலயங்கள், துறவு இல்ல ஆலயங்கள் அனைத்திலும், ஒரே நேரத்தில் கோவில் மணிகள் ஒலித்தன. லினாத்தே விமான நிலையத்திலிருந்து, “வெள்ளை வீடுகள் (Case Bianche)” என அழைக்கப்படும், ஏழைகள் வாழும் குடியிருப்புப் பகுதிக்கு முதலில் சென்றார் திருத்தந்தை. இத்தாலியின் வர்த்தக மற்றும், பணக்கார நகரமுமாக அமைந்துள்ள மிலானுக்கு மேற்கொண்ட இந்தப் பயணத்தில், முதலில் ஏழைகள் வாழும் பகுதிக்குத் திருத்தந்தை சென்றது, அவர் சமூகத்தின் விளிம்புக்குத் தள்ளப்பட்டவர்கள் மீது எவ்வளவு அன்பு கொண்டுள்ளார் என்பதையே காட்டுகின்றது. மிலானில் 1929ம் ஆண்டில் ஏற்பட்ட பொருளாதார நெருக்கடியின் காரணமாக, வேலையின்றி இருந்த ஏழைகளுக்கென, Forlanini என்ற இப்பகுதியில், 1930ம் ஆண்டில் வீடுகள் கட்டப்பட்டன. நாற்பது ஆண்டுகளுக்குப் பின்னர் அவை இடிக்கப்பட்டு, சிறு சிறு வீடுகளாக அமைக்கப்பட்டன. இங்கு வாழ்கின்றவர்களில், ஏறக்குறைய நாற்பது விழுக்காட்டினர் இத்தாலியைச் சேராதவர்கள். இவ்விடத்தில், Rom நாடோடி இனத்தவர், இஸ்லாமியர், புலம்பெயர்ந்த குடும்பத்தினர் போன்றோர் வாழ்ந்து வருகின்றனர். இப்பகுதியில் குடியிருக்கும், வலிப்பு நோயால் துன்புறும் 59 வயது நிரம்பிய லீனோ பாஸ்குவாலே தம்பதியர், 1989ம் ஆண்டில் மொரோக்கோவிலிருந்து மிலான் வந்து வாழ்கின்ற Mihoual Abdel Karin தம்பதியர், நோயால் கடுமையாய்த் துன்புறும் 82 வயது நிரம்பிய Nuccio Oneta தம்பதியர் ஆகியோரின் வீடுகளுக்குச் சென்று, சிறிது நேரம் செலவிட்டார் திருத்தந்தை. அச்சமயத்தில், செய்தியாளர்கள் யாரும் அனுமதிக்கப்படவில்லை. இவ்வீடுகளைப் பார்வையிட்ட பின்னர், அப்பகுதியில் வாழும் மக்களைச் சந்தித்து தன் எண்ணங்களை அவர்களோடு பகிர்ந்து கொண்டார் திருத்தந்தை பிரான்சிஸ்.
See More
மிலான் புனித விக்டர் சிறையில் கைதிகள் சந்திப்பு
இச்சனிக்கிழமை முற்பகல் 11.30 மணியளவில், மிலான் கர்தினால் ஆஞ்சலோ ஸ்கோலா அவர்களுடன், மிலான் புனித விக்டர் சிறைச்சாலை சென்றார் திருத்தந்தை பிரான்சிஸ். லொம்பார்தியா மாநில அதிகாரிகள் Luigi Pagano, Gloria Manzelli, சிறைச்சாலையின் ஆன்மீக அருள்பணியாளர் Marco Recalcati ஆகியோர், சிறைச்சாலையின் முகப்பில் நின்று திருத்தந்தையை வரவேற்றனர். ஆறு பகுதிகளாக, மூன்றடுக்கு கட்டடமாக அமைந்துள்ள இச்சிறைச்சாலையைப் பார்வையிட்ட திருத்தந்தை, ஏறக்குறைய எண்பது கைதிகளைத் தனித்தனியே கைகுலுக்கி வாழ்த்தினார். இச்சிறையில், பகல் 12.30 மணிக்கு, நூறு கைதிகளுடன் மதிய உணவருந்தினார் திருத்தந்தை பிரான்சிஸ். இச்சிறையில் தற்போது ஆண்களும், பெண்களும் என, தொள்ளாயிரத்திற்கும் மேற்பட்ட கைதிகள் உள்ளனர். தங்கள் குழந்தைகளோடு இருக்கும் அன்னையர் கைதிகளுக்கு தனி இடம் இங்கு உள்ளது. பிற்பகல் 2.15 மணிக்கு, இச்சந்திப்பை நிறைவு செய்து, அச்சிறைச்சாலையிலிருந்து மோன்சா பூங்காவில் திருப்பலி நிறைவேற்றுவதற்காக, காரில் சென்றார் திருத்தந்தை. பிற்பகல் 3 மணிக்குத் திருப்பலியைத் தொடங்கினார். கர்தினால் ஸ்கோலா அவர்கள், முதலில் திருத்தந்தையை வரவேற்றுப் பேசினார். ஏறக்குறைய பத்து இலட்சம் விசுவாசிகள் கலந்துகொண்ட இத்திருப்பலியில் திருத்தந்தை மறையுரையாற்றினார். இச்சனிக்கிழமை மாலை 5.30 மணிக்கு, மிலான் Meazza-San Siro அரங்கத்தில், இளையோர், பெற்றோர், மறைக்கல்வி ஆசிரியர்கள் போன்றோர் சந்திப்பு, கேள்வி பதில் முறையில் இடம்பெறுவதுதான் இந்த ஒரு நாள் மேய்ப்புப்பணி பயணத்தின் இறுதி நிகழ்வாகும். ஏழைகள், புலம்பெயர்ந்தோர், அருள்பணியாளர்கள், அருள்சகோதரிகள், குருத்துவ மாணவர்கள், தியாக்கோன்கள், கைதிகள், இளையோர், பெற்றோர், என எல்லா நிலையினரையும் ஒரு நாளில் சந்தித்து, அவர்களின் இறைநம்பிக்கையை ஆழப்படுத்தியுள்ளார் திருத்தந்தை பிரான்சிஸ். திருத்தந்தை அடிக்கடி கேட்டுக்கொள்வதன்படி, அவரின் இத்திருப்பணிக்காகச் செபிப்போம். ஆதாரம் : வத்திக்கான் வானொலி
See More
மிலான் பேராலயத்தில் அருள்பணியாளர்கள் துறவறத்தார் சந்திப்பு
திருத்தந்தை பிரான்சிஸ் அவர்கள், மிலானின் கிழக்கே அமைந்துள்ள, வெள்ளை வீடுகள் என்ற குடியிருப்புப் பகுதியில் வாழ்கின்ற வறியோரைப் பார்வையிட்டு, அம்மக்கள், வழங்கிய நன்கொடைகளை மகிழ்வோடு பெற்றுக்கொண்டு, மிலான் பேராலயத்திற்குச் சென்றார். அங்கு, அவ்வுயர்மறைமாவட்ட அருள்பணியாளர்கள், அருள்சகோதரிகள், குருத்துவ மாணவர்கள், தியாக்கோன்கள் ஆகியோரைச் சந்தித்தார். இப்பேராலயம், ஐரோப்பாவில் மிகப் புகழ்பெற்ற கட்டடங்களில் ஒன்றாகும். உலகில், Gothic கலைவண்ணத்தில் மிக அழகாக கட்டப்பட்டுள்ள மிகப் பெரிய பேராலயமாகவும், உலகில், இரண்டாவது பெரிய கத்தோலிக்கப் பேராலயமாகவும் இது உள்ளது. முதல் பேராலயம் கி.பி.335ம் ஆண்டில் கட்டி முடிக்கப்பட்டு புனித தேக்லாவுக்கு அர்ப்பணிக்கப்பட்டது. பின்னர் அதன் அருகில், 836ம் ஆண்டில் ஒரு பசிலிக்கா எழுப்பப்பட்டது. 1075ம் ஆண்டில் இவ்விடத்தில் பரவிய தீ, இவையிரண்டையும் அழித்தது. பின்னர், 1386ம் ஆண்டு தொடங்கிய இதன் கட்டுமானப் பணிகள், நெப்போலியன் போனபார்த்தே ஆணையிட்டதன் பேரில், 19ம் நூற்றாண்டில் முடிக்கப்பட்டன. 4ம் நூற்றாண்டில், மிலான் ஆயராகப் பணியாற்றிய புனித அம்புரோஸ், தனது மாணவரான புனித அகுஸ்தீனாருக்கு இப்பேராலயத்தில், திருமுழுக்கு அளித்ததற்குச் சான்றுகளும் உள்ளன. இச்சனிக்கிழமை காலை பத்து மணியளவில், திருத்தந்தை பிரான்சிஸ் அவர்கள், முதலில் இப்பேராலயத்தில் சிறிது நேரம் அமைதியாகச் செபித்தார். அதன்பின்னர், முதலில் மிலான் பேராயர் கர்தினால் ஆஞ்செலோ ஸ்கோலா அவர்கள் திருத்தந்தையை வரவேற்றுப் பேசினார். இப்பேராலயம், மிலான் மக்கள் அனைவருக்கும் மற்றும், மிலான் தலத்திருஅவை வாழ்விற்கும் இதயமாகவும், புனிதர்கள் அம்புரோஸ், சார்லஸ் ஆகியோரின் ஆலயமாகவும் விளங்குகின்றது. இக்காலத்திய நம் சகோதர, சகோதரிகள் இரக்கமுள்ளவர்களாக வாழவும், அதன் வழியாக அமைதியைப் பெறவும் தலத்திருஅவை முயற்சி செய்து கொண்டிருக்கின்றது. இயேசுவின் இரக்கம் நிறைந்த திருமுகம், நம் துன்பங்களை அகற்றி விடுகிறது. புனித சார்லஸ், திருத்தந்தை புனித 5ம் பத்திநாதரிடம் கூறியதுபோன்று, திருத்தந்தையே, நாங்களும் தங்களுக்காகச் செபிக்கின்றோம் என்பதை உறுதியுடன் தெரிவிக்கிறோம். இவ்வாறு கர்தினால் ஸ்கோலா அவர்கள், சிறிய வரவேற்புரை வழங்கிய பின்னர், இச்சந்திப்பு, கேள்வி பதில் முறையில் நடைபெற்றது. மரபுவழி கையளிக்கப்பட்ட பணிகளில், அருள்பணியாளர்கள், தங்கள் நேரத்தையும், சக்தியையும் செலவிட வேண்டியச் சூழலில், பன்முகக் கலாச்சாரத்தைக் கொண்டுள்ள இன்றைய மிலான் சமுதாயம் விடுக்கும் சவால்களையும் சந்திக்க வேண்டியுள்ளது. இந்நிலையில், நற்செய்திப் பணியின் மகிழ்வை உணர நாங்கள் செய்ய வேண்டியதென்ன என்று, அருள்பணி கபிரியேலே ஜோயா அவர்கள், முதலில் தன் கேள்வியை முன்வைத்தார். அடுத்து, 1990ம் ஆண்டு முதல், தியாக்கோனாக மறைப்பணியாற்றும் Roberto Crespi அவர்களின் கேள்விக்கும் பதில் சொன்னார் திருத்தந்தை. தற்போது மிலானில் 143 தியாக்கோன்கள் மறைப்பணியாற்றுகின்றனர். திருமணமாகி அல்லது திருமணமாகாமல் குடும்பங்களில் இருந்துகொண்டு இவர்கள் பணியாற்றுகின்றனர். தியாக்கோன்களாகிய நாங்கள் எங்கள் பணியில் எவ்வாறு திருஅவையின் முகத்தைப் பிரதிபலிப்பது? என்பது இவரது கேள்வி. மூன்றாவதாக, ஊர்சுலின் அருள்சகோதரிகள் சபையின் அருள்சகோதரி Paola Paganoni அவர்கள், இன்றைய உலகின் மனிதருக்கு, சிறுபான்மையினராக உள்ள அருள்சகோதரிகள், இறைவாக்கின் சான்றுகளாக, கற்பு, ஏழ்மை, பணிவு ஆகிய வார்த்தைப்பாட்டு வாழ்வை எவ்வாறு வாழ்வது? என்று கேட்ட கேள்விக்கும் பதில் சொன்னார் திருத்தந்தை பிரான்சிஸ். இந்தக் கேள்விகளுக்கு விரிவான பதில்களை வழங்கிய திருத்தந்தை, இறுதியில் எல்லாருடனும் சேர்ந்து செபித்து, அனைவருக்கும், தன் அப்போஸ்தலிக்க ஆசீரை அளித்து, இச்சந்திப்பை நிறைவு செய்தார். பின்னர், மிலான் பேராலய வளாகத்தில் கூடியிருந்த மக்களிடம், அன்புச் சகோதர, சகோதரிகளே, உங்களின் அமோக, இனிய வரவேற்பிற்கு மிக்க நன்றி. ஆண்டவருக்கும், அவரின் விருப்பத்திற்கும், இறைமக்களுக்கும் நான் பணிபுரிவதற்கு உதவியாக, எனக்காகச் செபியுங்கள் என்று சொல்லி, எல்லாருடனும் சேர்ந்து, மூவேளை செபத்தையும் செபித்தார் திருத்தந்தை. ஆதாரம் : வத்திக்கான் வானொலி
See More
மிலான் நகர வரவேற்பு நிகழ்வில் திருத்தந்தை வழங்கிய உரை
அன்பு சகோதர, சகோதரிகளே, காலை வணக்கம்! நீங்கள் வழங்கிய வரவேற்பிற்கு மிக்க நன்றி. எனக்களித்த இரு சிறப்பான பரிசுகளுக்கு தனிப்பட்ட முறையில் நன்றி கூறுகிறேன். நீங்கள் அளித்த முதல் பரிசு, அருள்பணியாளர்கள் திருப்பலியில் அணியும் கழுத்துப்பட்டை. இதன் வழியே, நான் இந்த நகருக்கு ஒரு அருள்பணியாளராக வந்திருப்பதை இந்தப் பரிசு குறிக்கிறது. என்னை உங்கள் பங்குத்தந்தை போல வரவேற்றுள்ளீர்கள். மேலும், இந்த கழுத்துப்பட்டை இதே நகரில் பாரம்பரிய முறையில் உருவாக்கப்பட்டுள்ளது என்பது, இதனை இன்னும் சிறப்பான ஒரு பரிசாக மாற்றுகிறது. நீங்கள் எனக்களித்த இரண்டாவது பரிசு, அன்னையின் திரு உருவம். இந்நகருக்குள் நான் நுழைந்ததும், நீங்கள் இந்த பரிசை வழங்கியிருப்பதன் வழியே, அன்னை மரியாவே என்னை வரவேற்பதைப்போல் உணர்கிறேன். தன் உறவினரான எலிசபெத்தை மரியா தேடிச் சென்றதைப்போல, என்னையும் தேடி வந்துள்ளார் என்பதை உணர்கிறேன். மிலான் பேராலயத்தில் மேலுள்ள அன்னை மரியாவின் உருவம் புதுப்பிக்கப்பட்டதை இந்த பரிசு உணர்த்துகிறது. அன்னை மரியாவின் உருவம் புதுப்பிக்கப்பட்டதைப்போல, இறைவனின் சாயலில் உருவாக்கப்பட்டுள்ள நம் ஒவ்வொருவரையும் இறைவன் புதுப்பிப்பாராக! நீங்கள் வழங்கிய இவ்விரு பரிசுகளுக்கும் மீண்டும் ஒருமுறை நன்றி. உங்கள் அனைவரையும் இறைவன் ஆசீர்வதிப்பாராக! அன்னை மரியா பாதுகாப்பாராக! ஆதாரம் : வத்திக்கான் வானொலி
See More
மிலான் நகர திருப்பலியில் திருத்தந்தையின் மறையுரை
அன்பு சகோதர, சகோதரிகளே, நமது வரலாற்றின் மிக முக்கியமான அறிவிப்பை இப்போது கேட்டோம் (காண்க. லூக்கா 1,26-38). திருமுழுக்கு யோவான் பிறப்பைக் குறித்து வழங்கப்பட்ட செய்தியின் (காண்க லூக்கா 1,5-20) வெளிச்சத்தில் பொருள் செறிந்த இப்பகுதியைச் சிந்தித்துப்பார்க்க விழைகிறேன். மக்கள் அனைவரும் வெளியில் காத்துக்கொண்டிருந்த வேளையில், குரு செக்கரியா இறைவன் சன்னதியில் பணியாற்றியபோது, திருமுழுக்கு யோவானின் பிறப்பு குறித்த செய்தி வழங்கப்பட்டது. இயேசுவின் பிறப்பு குறித்த செய்தியோ, அதிகம் அறியப்படாத ஒரு கிராமத்தில், ஒரு வீட்டில், மரியா என்ற இளம் பெண்ணுக்கு வழங்கப்பட்டது. இறைவன் வந்து தங்க விழையும் ஆலயங்கள், நாம் எதிர்பாராத இடங்களில் இருக்கும் என்பதை இந்நிகழ்வு காட்டுகிறது. எந்த ஒரு மனிதச் சூழலும் இறைவன் வந்து தங்குவதற்குப் புறம்பான சூழல் இல்லை. மரியாவின் இல்லம் தேடி வந்த இறைவன், நம் ஒவ்வொருவர் இல்லத்தையும், நம் சாதாரண வாழ்வையும் தேடி வருகிறார். நமது இல்லங்களில், நாம் பணியாற்றும் இடங்களில், நமது நகரங்களில் "மகிழுங்கள், ஆண்டவர் உங்களோடு இருக்கிறார்" என்ற நற்செய்தி ஒலிக்கிறது. "இது எப்படி நிகழும்?" என்று மரியா கலங்கி நின்றதைப்போல, நாமும் நமது சூழல்களை எண்ணி புரியாமல் நிற்கிறோம். வறியோர், புலம்பெயர்ந்தோர், வேலையற்ற இளையோர் என்ற பல பிரச்சனைகளை எண்ணி நாமும் கலங்கி நிற்கிறோம், நம்பிக்கை இழக்கிறோம். நம்மைச்சுற்றி மிகத் துரித வேகத்தில் நடைபெறும் நிகழ்வுகள், நமது நம்பிக்கையையும், மகிழ்வையும் களவாடிச் செல்கின்றன. இந்த வேகத்தால், நமது வாழ்வு முன்னேறும் என்ற கருத்து சொல்லப்பட்டாலும், நமது குடும்பம், நண்பர்கள், நாம் வாழும் சமுதாயம் ஆகியவற்றிற்கு நேரம் ஒதுக்கமுடியாமல் தவிக்கிறோம். நற்செய்தியின் மகிழ்வை இன்று நமது நகரங்களில் எவ்விதம் வாழ்வது? இன்றையச் சூழலில் கிறிஸ்தவ நம்பிக்கையை எவ்விதம் கொண்டிருப்பது? இவ்விரு கேள்விகளும், நம்மையும், நமது குழந்தைகளையும் உள்ளடக்கியுள்ளன. குழம்பி நின்ற மரியாவுக்கு வானதூதர் அளித்த பதிலில், நாம் மூன்று கருத்துக்களை உணரலாம். 1. வரலாற்று நினைவை வரவழைத்தல்: மீட்பின் வரலாற்றில் மரியா ஒரு பகுதி என்பதை வானதூதர் உணர்த்தினார். உடன்படிக்கையின் மகள் அவர் என்பதை புரிந்துகொள்ளச் செய்தார். நாமும், வரலாற்றினால் உருவாக்கப்பட்டவர்கள். இரு உலகப் போர்களின் வேதனைகளை உணர்ந்த ஒரு நாட்டில் நாம் வாழ்கிறோம். கடினமான உழைப்பால் மீண்டும் கட்டியெழுப்பப்பட்ட வரலாற்றில் வாழ்கிறோம். எனவே, அனைத்தும் எளிதாகக் கிடைக்கும் என்ற மந்திர, தந்திரத்தை நம்பாமல் இருக்க, நமது வரலாற்று நினைவு உதவி செய்யும். 2. கடவுளின் மக்கள் என்ற உண்மையில் பங்கேற்றல்: மரியாவுக்கு உணர்த்தப்பட்ட வரலாற்று நினைவு, அவர் கடவுளின் மக்கள் என்ற குழுமத்தில் ஒருவர் என்பதையும் புரிந்துகொள்ள உதவியது. பல வேறுபாடுகளைக் கொண்ட சமுதாயத்தில் நாம் வாழ்ந்தாலும், அனைவரும் கடவுளின் மக்கள் என்ற உணர்வே, நம் அனைவரையும் ஒருங்கிணைக்க முடியும். 3. முடியாதது, முடியும் என்ற உணர்வு: "கடவுளால் இயலாதது ஒன்றுமில்லை" (லூக்கா 1:37) என்ற வார்த்தைகளை, வானதூதர் மரியாவுக்கு வழங்குகிறார். நம்மை மட்டுமே சார்ந்து நாம் வாழும்போது, நமது சக்திகளுக்குள் நாம் சிறைப்பட்டுவிடுகிறோம். இறைவனின் அருளுக்காக நம்மை திறந்து வைக்கும்போது, முடியாதது என்பனவும் முடிகின்றது. நமது சக்திகளை நம்பி, நம்பிக்கையின்மையில் சிறைப்படுவதற்குப் பதில், கடவுளின் அருளில் நம்பிக்கைக் கொண்டு, முடியாததென தெரிவனவற்றையும் முடிப்போம். புனித அம்புரோஸ், இந்த நற்செய்திப் பகுதிக்கு அளித்த விளக்கத்தில், "மிகக் கடினமானச் சூழல்களிலும், நம்பிக்கை கொண்ட மரியாவைப் போன்ற உள்ளத்தை கடவுள் தொடர்ந்து தேடுகிறார்" என்று கூறியுள்ளார். அவ்வகை உள்ளத்தையும், நம்பிக்கையையும் இறைவன் நமக்கு வழங்குவாராக! ஆதாரம் : வத்திக்கான் வானொலி
See More
அன்புச் செயல்களுடன் கடைப்பிடிக்கப்படும் நோன்பு பயனுள்ளது
"நமக்கு அடுத்திருப்பவர்களிடம், குறிப்பாக, இன்னல்களில் இருப்பவர்களிடம், நம் அன்பை தெளிவான செயல்களால் வெளிப்படுத்தி கடைப்பிடிக்கப்படும் நோன்பே பயனுள்ளதாகும்"; “தங்களின் விசுவாசத்திற்காக அடக்குமுறைகளால் துன்புறும் நம் கிறிஸ்தவ சகோதர சகோதரிகளை நினைவுகூர்வோம். அவர்களோடு ஒன்றிணைந்திருப்போம்” என்ற சொற்கள், திருத்தந்தை பிரான்சிஸ் அவர்களின் டுவிட்டர் செய்திகளாக, இவ்வெள்ளியன்று வெளியிடப்பட்டன. மேலும், மார்ச் 25, இச்சனிக்கிழமை, மிலான் நகருக்கு ஒருநாள் மேய்ப்புப்பணி பயணத்தை மேற்கொள்கிறார், திருத்தந்தை பிரான்சிஸ். திருத்தந்தையின் இப்பயணத்தை முன்னிட்டு, சில முக்கியமான இத்தாலியப் புனிதர்கள் பற்றிய 44 கலைவேலைப்பாடுகள் கொண்ட அருங்காட்சியகம், முதன் முறையாக, மிலான் நகரின் Reale மாளிகையில், இச்சனிக்கிழமையன்று, பொது மக்கள் பார்வைக்கு வைக்கப்படும் என அறிவிக்கப்பட்டுள்ளது. கடந்த ஆண்டில், Lazio மாநிலத்தில், இடம்பெற்ற நிலநடுக்கத்திற்குப் பின்னர், Accumoli கிராமத்திலுள்ள, அசிசி நகர் புனித பிரான்சிஸ் ஆலயத்திலிருந்து எடுக்கப்பட்ட, அப்புனிதர் பரவச நிலையில் உள்ள ஓவியம் உட்பட, பொது மக்கள் மிகவும் பக்தியுடன் போற்றும் புனிதர்கள் பற்றிய விவரங்களும், இந்த அருங்காட்சியகத்தில் வைக்கப்பட்டிருக்கும். இந்த அருங்காட்சியத்தின் முதல் பகுதியில், புனிதர்களான அசிசி நகர் பிரான்சிஸ், சியன்னா நகர் கத்ரீன் ஆகிய இருவர் பற்றிய கலைப்பொருள்கள் இடம்பெற்றிருக்கும். இரண்டாவது பகுதியில், உரோம் பாதுகாவலர்களான புனிதர்கள் பேதுரு, பவுல், மிலான் பாதுகாவலர்களான புனிதர்கள் அம்புரோஸ், சார்லஸ் பொரோமேயோ போன்றோர் பற்றிய கலைப்பொருள்கள் வைக்கப்பட்டிருக்கும். இந்த அருங்காட்சியகம், வருகிற ஜூன் 4ம் தேதி வரை வைக்கப்பட்டிருக்கும். இன்னும், EU என்ற ஐரோப்பிய ஒன்றியத்தைச் சேர்ந்த நாடுகள் மற்றும், அரசுகளின் 27 தலைவர்களை, இவ்வெள்ளி மாலை ஆறு மணிக்கு, திருப்பீடத்தின் Regia அறையில், சந்திக்கிறார், திருத்தந்தை பிரான்சிஸ். ஐரோப்பிய ஒன்றியம் உருவாக அடிப்படையாக விளங்கிய, ஐரோப்பிய பொருளாதார சமுதாயத்தின் ஒப்பந்தம், உரோம் நகரில் கையெழுத்திடப்பட்டதன் 60ம் ஆண்டு நிறைவையொட்டி, உரோம் நகருக்கு வருகை தரும் ஐரோப்பிய அரசுத் தலைவர்கள், திருத்தந்தை பிரான்சிஸ் அவர்களை, மார்ச் 24ம் தேதி திருப்பீடத்தில் சந்திக்கின்றனர். ஆதாரம் : ANSA /வத்திக்கான் வானொலி
See More
கொல்லப்பட்ட அ.சகோ.ராணி மேரியின் வாழ்வுமுறை ஏற்பு
இந்தியாவில், 22 ஆண்டுகளுக்கு முன்னர் கொல்லப்பட்ட அருள்சகோதரி, இறையடியார் ராணி மேரி வட்டாலில் அவர்களை, அருளாளராக உயர்த்துவதற்கு, அவருடைய வீரத்துவமான வாழ்வு குறித்த விவரங்களை, திருத்தந்தை பிரான்சிஸ் அவர்கள் ஏற்றுக்கொண்டுள்ளார். கர்தினால் ஆஞ்செலோ அமாத்தோ அவர்கள் இவ்வியாழனன்று திருத்தந்தையைச் சந்தித்து, புனிதர் மற்றும், அருளாளர் நிலைகளுக்கு உயர்த்துவதற்கென, சிலரின் வாழ்வு முறைகளை பரிந்துரைத்தவேளையில், அருள்சகோதரி, இறையடியார் ராணி மேரி அவர்களை, மறைசாட்சியாக, அருளாளர் நிலைக்கு உயர்த்துவதற்கு ஒப்புதல் அளித்தார் திருத்தந்தை பிரான்சிஸ். பிரான்சிஸ்கன் கிளாரிஸ்ட் அருள்சகோதரிகள் சபையைச் சேர்ந்த அருள்சகோதரி, இறையடியார் ராணி மேரி அவர்கள், 1995ம் ஆண்டு பிப்ரவரி 25ம் தேதி, பேருந்தில் இன்டோர் நகருக்குப் பயணம் செய்துகொண்டிருந்தபோது, 41 வயது மதிக்கத்தக்க சமந்தார் சிங் என்பவரால், குறைந்தது ஐம்பது முறைகள் கத்தியால் குத்தப்பட்டு இறந்தார். மத்திய பிரதேச மாநிலத்தில், இன்டோர் மறைமாவட்டத்தில், ஏழைகள் மத்தியில், அருள்சகோதரி, இறையடியார் ராணி மேரி அவர்கள் ஆற்றிவந்த பணிகளால் எரிச்சலடைந்த சில பண்ணையார்களின் தூண்டுதலால், இவர் கொலைசெய்யப்பட்டார். இச்சகோதரியின் குடும்பத்தினர், கொலையாளியான சமந்தார் சிங் அவர்களை மன்னித்து, அவரை அடிக்கடி சிறையில் சென்று சந்தித்துப் பேசியதன் பயனாக, தற்போது, சமந்தார் சிங் மனம் மாறி, அருள்சகோதரி இறையடியார் ராணி மேரி அவர்களின் பக்தராக மாறியுள்ளார். 1954ம் ஆண்டு சனவரி 29ம் தேதி கேரளாவின் கொச்சி நகருக்கு அருகிலுள்ள Pulluvazhy என்ற ஊரில் பிறந்த அருள்சகோதரி ராணி மேரி அவர்கள், Kidangoorல், பிரான்சிஸ்கன் கிளாரிஸ்ட் சபையில், 1972ம் ஆண்டில் சேர்ந்து, 1974ம் ஆண்டில் முதல் வார்த்தைப்பாடு கொடுத்தார். 1975ம் ஆண்டில் வட இந்தியாவில் Bijnoreல் தனது மறைப்பணியைத் தொடங்கிய இச்சகோதரி, 1992ம் ஆண்டில், Udainagarல் பணியாற்றச் சென்றார். 1995ம் ஆண்டு பிப்ரவரி 25ம் தேதி, தனது 54வது வயதில், கொல்லப்பட்டார் அருள்சகோதரி, இறையடியார் ராணி மேரி. ஆதாரம் : வத்திக்கான் வானொலி
See More
திருஅவைக்கு ஐரோப்பா மிகவும் தேவைப்படுகின்றது
ஐரோப்பிய பொருளாதார சமுதாயத்தின் ஒப்பந்தம் உரோம் நகரில் கையெழுத்திடப்பட்டதன் 60ம் ஆண்டு நிறைவை முன்னிட்டு, இவ்வியாழன் மாலையில், உரோம் நகரின் Santa Maria sopra Minerva என்ற ஆலயத்தில் நன்றித் திருப்பலி நிறைவேற்றினார், ஐரோப்பிய திருஅவை அதிகாரி ஒருவர். ஐரோப்பிய ஆயர்கள் பேரவை கூட்டமைப்பின் (CCEE) தலைவரும், இத்தாலிய ஆயர் பேரவை (CEI) தலைவருமான கர்தினால் ஆஞ்சலோ பஞ்ஞாஸ்கோ அவர்கள், இத்திருப்பலியை நிறைவேற்றி மறையுரையாற்றுகையில், திருஅவைக்கு ஐரோப்பா மிகவும் தேவைப்படுகின்றது என்றும், இக்கண்டத்திலுள்ள நாடுகள், ஐரோப்பிய ஒன்றியத்தை மிகுந்த கவனத்துடனும், அக்கறையுடனும் நோக்குகின்றன என்றும் கூறினார். மத்திய இலண்டன் பகுதியில் நடைபெற்றுள்ள வன்முறைத் தாக்குதல்கள் மற்றும், அண்மை ஆண்டுகளில், ஏனைய நாடுகளில், வன்முறைகளில் பலியானவர்களுக்காகச் செபித்த கர்தினால் பஞ்ஞாஸ்கோ அவர்கள், பாதுகாப்பு, அமைதி, பலனுள்ள பரிமாற்றங்கள் ஆகிய ஐரோப்பிய பாரம்பரியங்கள் தொடர்ந்து காக்கப்படுமாறு கேட்டுக்கொண்டார். ஐரோப்பிய நாடுகளும், நிறுவனங்களும், தலைவர்களும், அமைதியின் இளவரசராம் கிறிஸ்துவிடமிருந்து ஒளியும் வலிமையும் பெற வேண்டுமென்று செபித்த கர்தினால் பஞ்ஞாஸ்கோ அவர்கள், ஐரோப்பா நற்செய்தியில் உயிரூட்டம் பெறுமாறும் வலியுறுத்தினார். ஐரோப்பிய பொருளாதார சமுதாயத்தின் ஒப்பந்தம், 1957ம் ஆண்டு மார்ச் 25ம் தேதி, உரோம் நகரில் கையெழுத்திடப்பட்டது. ஆதாரம் : வத்திக்கான் வானொலி
See More
அமெரிக்க கர்தினால் கீலெர் மறைவுக்கு திருத்தந்தை இரங்கல்
அமெரிக்க ஐக்கிய நாட்டின் பால்டிமோர் முன்னாள் பேராயர் கர்தினால் வில்லியம் ஹென்ரி கீலெர்(William Henry Keeler) அவர்கள், மரணமடைந்ததையொட்டி, தனது அனுதாபங்களைத் தெரிவிக்கும் இரங்கல் தந்தியை அனுப்பியுள்ளார், திருத்தந்தை பிரான்சிஸ். பால்டிமோரின் தற்போதைய பேராயர் வில்லியம் லோரி அவர்களுக்கு, இத்தந்திச் செய்தியை அனுப்பியுள்ள திருத்தந்தை, உலகளாவியத் திருஅவைக்கும், தலத்திருஅவைக்கும், கர்தினால் கீலெர் அவர்கள் ஆற்றியுள்ள சிறப்பான பணிகளுக்கு, நன்றியும், பாராட்டும் தெரிவித்துள்ளார். மார்ச் 23, இவ்வியாழன் அதிகாலையில், Catonsvilleலிலுள்ள புனித மார்ட்டீன் வயதானவர் இல்லத்தில், தனது 86வது வயதில் மரணமடைந்தார் கர்தினால் கீலெர். இவரின் அடக்கச் சடங்கு, மார்ச் 28ம் தேதி நடைபெறும். 2007ம் ஆண்டில் பணி ஓய்வு பெற்ற கர்தினால் கீலெர் அவர்கள், 1992ம் ஆண்டு முதல் 1995ம் ஆண்டு வரை, அமெரிக்க ஐக்கிய நாட்டு ஆயர் பேரவையின் தலைவராகப் பணியாற்றியுள்ளார். 1931ம் ஆண்டில் பிறந்த இவர், 1989ம் ஆண்டில் பால்டிமோர் பேராயராகவும், 1994ம் ஆண்டில் கர்தினாலாகவும் உயர்த்தப்பட்டார். 2005ம் ஆண்டில் வத்திக்கானில், முன்னாள் திருத்தந்தை 16ம் பெனடிக்ட் அவர்கள் தேர்ந்தெடுக்கப்பட்ட கான்கிளேவ் அவையிலும் கலந்துகொண்டார், கர்தினால் கீலெர். கர்தினால் கீலெர் அவர்களின் இறப்போடு, திருஅவையில் மொத்த கர்தினால்களின் எண்ணிக்கை 223. இவர்களில் எண்பது வயதுக்குட்பட்ட, திருத்தந்தையைத் தேர்ந்தெடுக்கும் தகுதியுடைய கர்தினால்களின் எண்ணிக்கை 117. ஆதாரம் : வத்திக்கான் வானொலி
See More
திருத்தந்தை, பீஜி அரசுத்தலைவர் சந்திப்பு
பீஜி (Fiji) நாட்டு அரசுத்தலைவர் Jioji Konousi Konrote அவர்கள், அமைதியின் மனிதர், மக்கள் அமைதியில் வாழ்வதற்கு, இவர் அதிகம் உதவி செய்கிறார் என்று பாராட்டினார், திருத்தந்தை பிரான்சிஸ். பீஜி அரசுத்தலைவர் Konrote அவர்களை, இவ்வெள்ளியன்று திருப்பீடத்தில், ஏறத்தாழ இருபது நிமிடங்கள் தனியே சந்தித்து உரையாடிய திருத்தந்தை, இவ்வாறு கூறினார். இச்சந்திப்பிற்குப் பின்னர், திருப்பீடச் செயலர், கர்தினால் பியெத்ரோ பரோலின், திருப்பீடத்தின் பன்னாட்டு உறவுகள் துறையின் செயலர், பேராயர் பால் காலகர் ஆகிய இருவரையும் சந்தித்துப் பேசினார் பீஜி அரசுத்தலைவர் Konrote. இச்சந்திப்புகள் குறித்து அறிக்கை வெளியிட்ட திருப்பீடச் செய்தித் தொடர்பகம், பீஜி நாட்டிற்கும், திருப்பீடத்திற்கும் இடையே நிலவும் நல்லுறவுகள் குறித்தும், பீஜி நாட்டின் கல்வி, நலவாழ்வு உட்பட, பொது நலனைக் காப்பதில், கத்தோலிக்கத் திருஅவை காட்டிவரும் ஆர்வம், ஈடுபாடு ஆகியவை குறித்தும் பேசப்பட்டதென கூறியது. காலநிலை மாற்றம் குறித்து, குறிப்பாக, இவ்விவகாரத்தோடு தொடர்புடைய நன்னெறிக் கூறுகள் குறித்தும், மிகவும் நலிந்த சமூகக் குழுக்களுடனும், நாடுகளுடனும் ஒருமைப்பாட்டுணர்வு காட்டப்பட வேண்டியதன் அவசியம் குறித்தும், இச்சந்திப்புக்களில் அக்கறையுடன் பேசப்பட்டதெனவும், திருப்பீடச் செய்தித் தொடர்பகம் கூறியது. படகு வடிவ இசைக் கருவி ஒன்றை, திருத்தந்தைக்குப் பரிசாக அளித்தார், பீஜி அரசுத்தலைவர் Konrote. தென் பசிபிக் பெருங்கடல் பகுதியில், முன்னூறுக்கும் மேற்பட்ட தீவுகளைக் கொண்டுள்ள பீஜி நாடு, தென்னை மரங்கள் நிறைந்த கடற்கரைகளையும், பவளப் பாறைகளையும், கரடுமுரடான நிலபரப்புகளையும் கொண்டுள்ள அழகான நாடாகும். மேலும், திருப்பீட ஆயர்கள் பேராயத் தலைவர் கர்தினால் Marc Ouellet, திருப்பீட விசுவாச கோட்பாட்டுப் பேராயத் தலைவர் கர்தினால் Gerhard Ludwig Müller, திருப்பீட கீழை வழிபாட்டுமுறை பேராயத் தலைவர் கர்தினால் லெயோனார்தோ சாந்திரி ஆகியோரையும், இவ்வெள்ளி காலையில், திருப்பீடத்தில் தனித்தனியாகச் சந்தித்துப் பேசினார் திருத்தந்தை பிரான்சிஸ். ஆதாரம் : வத்திக்கான் வானொலி
See More