உங்களுக்குத் தெரியுமா ?
வேரித்தாஸ் நிகழ்ச்சிகளை டிஜிட்டல் தொழில் நுட்பத்தில் 24 மணிநேரமும், 7 நாட்களிலும் இணையத்தளத்திலும் அன்ராய்டு மொபைலிலும் கேட்கலாம். அன்ராய்டு மொபைல் பயன்பாட்டினைப் பதிவிறக்கம் செய்ய RVA MOBILEஎன டைப் செய்யவும்

திருச்சபை செய்திகள்

இந்து சமுதாயத்தின் வளமையான பாரம்பரியம் காக்கப்பட வேண்டும்
சிறுபான்மை சமூகங்கள் மீது சகிப்புத்தன்மையும், அவைகளுக்குப் பாதுகாப்பும் வழங்கும் இந்து சமுதாயத்தின் வளமையான பாரம்பரியம் தொடர்ந்து காக்கப்பட வேண்டும் என்று வலியுறுத்தினார் சீரோ மலங்கரா திருஅவைத் தலைவர் கர்தினால் பசிலியோஸ் கிளீமிஸ். 139வது மன்னம் ஜெயந்தி கொண்டாட்டங்களை Perunnaவிலுள்ள NSS தலைமையகத்தில் ஆரம்பித்து வைத்து உரையாற்றிய கர்தினால் கிளீமிஸ் அவர்கள், இந்திய அரசியல் அமைப்பில் சிறுபான்மை சமூகங்களுக்குப் பாதுகாப்பு அளிக்கப்படுவது முறைப்படுத்தபடுவதே, நாட்டின் நீண்ட காலப் பாரம்பரியத்தை, நவீன காலத்தில் கட்டிக்காப்பதற்கு உதவும் என்று கூறினார். சமுதாயத்தில் அதிகரித்துவரும் பிளவுகள் பற்றிக் குறிப்பிட்ட கர்தினால் கிளீமிஸ் அவர்கள், நாம் பேசுவதற்கு மட்டுமல்ல, நாம் நிலைத்து நிற்பதற்கும் இடம் தேவை என்றும், பன்முகத்தன்மையே மக்கள் ஒன்று சேர்ந்து நிற்பதற்கு உதவியுள்ளது என்றும் கூறினார். NSS அமைப்பின் சமய சார்பற்ற மற்றும் சனநாயகக் கோட்பாடுகளைப் பாராட்டிப் பேசிய கர்தினால், இந்த அமைப்பைத் தொடங்கிய Mannathu Padmanabhan அவர்களின் தொலைநோக்கு விழுமியங்கள் தொடர்ந்து காக்கப்படுமாறு வலியுறுத்தினார்.
See More
திருப்பீடம்,பாலஸ்தீனம் புரிந்துணர்வு ஒப்பந்தம் அமலுக்கு...
திருப்பீடத்திற்கும், பாலஸ்தீனாவுக்கும் இடையே ஏற்பட்டுள்ள புரிந்துணர்வு ஒப்பந்தம் முழுமையாக அமலுக்கு வந்துள்ளது என்று, திருப்பீடம் அறிவித்துள்ளது. 2015ம் ஆண்டு ஜூன் 26ம் தேதி திருப்பீடமும், பாலஸ்தீனாவும் கையெழுத்திட்ட புரிந்துணர்வு ஒப்பந்தம் அமலுக்கு வந்துள்ளது என்று, சனவரி 02, கடந்த சனிக்கிழமையன்று திருப்பீடம் அறிவித்தது. பாலஸ்தீனாவில் திருஅவையின் வாழ்வு மற்றும் நடவடிக்கைகளின் முக்கியமான கூறுகளை ஏற்கும் அதேவேளை, புனித பூமியில் இடம்பெற்று வரும் மோதல்களுக்கு உரையாடல் வழியாக, அமைதியான தீர்வு காணப்படுவதற்கு, திருப்பீடத்தின் ஆதரவுக்கு இந்த ஒப்பந்தம் உறுதியளிக்கிறது.
See More
தீமைக்கு எதிராக எப்போதும் விழிப்புடன் இருக்க திருத்தந்தை அழைப்பு
நம் இதயங்களை இயேசுவுக்குத் திறந்து வைப்பதன் வழியாக, நம் வாழ்வை, தீமை வெற்றி அடையாது என்று இஞ்ஞாயிறு மூவேளை செப உரையில் கூறினார் திருத்தந்தை பிரான்சிஸ். 2016ம் ஆண்டின் முதல் ஞாயிறாகிய சனவரி 3ம் தேதியன்று, வத்திக்கான் தூய பேதுரு வளாகத்தில் கூடியிருந்த முப்பதாயிரத்துக்கு மேற்பட்ட விசுவாசிகளுக்கு, இவ்வாண்டின் முதல் நண்பகல் மூவேளை செப உரை வழங்கிய திருத்தந்தை இவ்வாறு கூறினார். வாக்கு மனிதர் ஆனார், நம்மிடையே குடிகொண்டார் என்றுரைக்கும் தூய யோவான் நற்செய்தியின் முதல் பிரிவிலிருந்து எடுக்கப்பட்ட வாசகத்தை மையமாக வைத்து சிந்தனைகளை வழங்கிய திருத்தந்தை பிரான்சிஸ் அவர்கள், வாக்கு ஒளியாக இருந்தாலும், மனிதர் இருளையே விரும்புகின்றனர், வாக்கு தம்மவரிடம் வந்தார், ஆனால் அவர்களோ அவரை ஏற்கவில்லை, இறைமகனின் முன்பாக, தங்கள் கதவுகளை மூடினர் என்றும் கூறினார். நம் வாழ்வைப் பாழ்படுத்துவது தீமை, எனவே அது நம் வாழ்வை வெற்றிகொள்ளாமல் இருப்பதற்கு நாம் விழிப்புடன் இருக்க வேண்டும் என்றுரைத்த திருத்தந்தை, தீமையை நம்மில் அனுமதித்தால் நமக்கு ஐயோ கேடு என்றும் கூறினார். நாம் இயேசுவை வரவேற்றால், அவரின் அன்பிலும், அவரைப் புரிந்துகொள்வதிலும் வளர்வோம், இயேசு போன்று நாமும் இரக்கமுள்ளவர்களாக வாழ்வதற்குக் கற்றுக்கொள்வோம் என்றும் கூறினார் திருத்தந்தை. சிறப்பாக, இந்த இரக்கத்தின் ஆண்டில், நம் வாழ்விலும் நற்செய்தி நம் சதையோடு ஒன்றியதாக மாறும்படிச் செய்வோம் என்றும் மூவேளை செப உரையில் கூறினார் திருத்தந்தை பிரான்சிஸ்.
See More
இறைவனின் மன்னிப்பில் நம்பிக்கை வையுங்கள்:திருத்தந்தை பிரான்சிஸ்
உரோம் தூய மேரி மேஜர் பசிலிக்காவில் புனிதக் கதவைத் திறந்து வைத்து திருப்பலி நிறைவேற்றிய திருத்தந்தை பிரான்சிஸ் அவர்கள், திருப்பலியின் இறுதியில், அப்பசிலிக்காவில் Salus Populi Romani அன்னை மரியா வணக்கம் செலுத்தப்பட்டுவரும் புனித பவுல் சிற்றாலயத்தின் கதவையும் திறந்து வைத்து, அன்னைக்கு மலர்கள் சாற்றி, தூபமிட்டுச் செபித்தார். பின்னர் இப்பசிலிக்காவின் புனிதக் கதவின்முன் நின்ற திருத்தந்தை பிரான்சிஸ் அவர்கள், இறைவனின் தூய அன்னையாகிய புனித கன்னி மரியா நம் அருகில் இருக்கிறார், நமக்காகப் பரிந்து பேசுகிறார் என்ற உணர்வில், இந்த இரக்கத்தின் புனிதக் கதவைக் கடந்து செல்வோம் என்று கூறினார். அவரது மகன் இயேசுவைச் சந்திப்பதில் இருக்கும் அழகை நாம் மீண்டும் கண்டுணர அத்தாய் நம்மை அழைத்துச் செல்ல நம்மை அனுமதிப்போம், நம் இதயக் கதவுகளை, மன்னிப்பின் மகிழ்வுக்கு அகலத் திறப்போம் என்றும் கூறினார் திருத்தந்தை. பிள்ளைகளுக்குரிய அன்புடனும், பாசத்துடனும், நம் அன்னையை நோக்கி, இறைவனின் தூய அன்னையே என்று அனைவரும் சப்தமாக மூன்று முறை சொல்வோம் என்று விசுவாசிகளிடம் திருத்தந்தை கூற, அனைவரும் இறைவனின் தூய அன்னையே என்று சப்தமாக மூன்று முறை கூறினர். இறைவனின் மன்னிப்பில் நம்பிக்கை வையுங்கள், உங்கள் எல்லாருக்கும் புதிய ஆண்டு நல்வாழ்த்துக்கள் என்று சொல்லி, இத்திருவழிபாட்டை நிறைவுக்குக் கொணர்ந்தார் திருத்தந்தை பிரான்சிஸ். 431ம் ஆண்டில் எபேசு பொதுச் சங்கத்தில் மரியா இறைவனின் அன்னை என்று அறிவிக்கப்பட்ட பின்னர், திருஅவை வரலாற்றில் மரியாவுக்கென கட்டப்பட்ட முதல் ஆலயம் உரோம் தூய மேரி மேஜர் பசிலிக்காவாகும். ஆதாரம் : வத்திக்கான் வானொலி
See More
மரியா, மன்னிப்பின் தாய் : திருத்தந்தை பிரான்சிஸ்
இறைவனின் அன்னையாகிய மரியா, மன்னிப்பின் அன்னையாகவும் இருக்கிறார், இந்த மன்னிப்புக்கு, வரையறைகள் எதுவும் தெரியாது மற்றும் இது நம் வாழ்வைப் புதுப்பித்து அதை உண்மையான மகிழ்வால் நிரப்புகின்றது என்று திருத்தந்தை பிரான்சிஸ் அவர்கள் கூறினார். தூய கன்னி மரியா, இறைவனின் அன்னை என்ற விழாவைச் சிறப்பித்த சனவரி 1, இவ்வெள்ளி மாலையில், உரோம் தூய மேரி மேஜர் பசிலிக்காவில் எளிய முறையில் புனிதக் கதவைத் திறந்து வைத்து திருப்பலி நிறைவேற்றிய திருத்தந்தை பிரான்சிஸ் அவர்கள் தனது மறையுரையில் இவ்வாறு கூறினார். பல வேறுபாடுகளுடன்கூடிய இந்த உலகின் ஞானத்திற்கு அல்லது சட்டத்தின் வறட்டு வாதங்களுக்குமுன் நிறுத்திவிடாத மன்னிப்பை, மன்னிப்பின் அன்னை, திருஅவைக்குக் கற்றுத் தருகிறார் என்றும் கூறினார் திருத்தந்தை பிரான்சிஸ். இரக்கத்தின் அன்னையே, இறைவனின் தாயே, மன்னிப்பின் அன்னையே, நம்பிக்கையின் அன்னையே, தூய மகிழ்வால் முழுவதும் நிறைந்த அன்னையே வாழ்க என்று பொருள்படும் Salve Mater Misericordiae! என்ற பழங்கால இலத்தீன் பாடலையும் தனது மறையுரையில் குறிப்பிட்டார் திருத்தந்தை. தூய கன்னி மரியாவை, எல்லாவற்றுக்கும் மேலாக இரக்கத்தின் அன்னையாக நாம் இறைஞ்சுவது இந்த நாளில் மிகவும் பொருத்தமாக உள்ளது என்றும், நாம் திறந்துள்ள புனிதக் கதவு, உண்மையில், இறைஇரக்கத்தின் புனிதக் கதவு என்றும் கூறினார் திருத்தந்தை பிரான்சிஸ். இந்தப் புனிதக் கதவைக் கடந்து செல்லும் ஒவ்வொருவரும், முழு நம்பிக்கை மற்றும் அச்சத்திலிருந்து விடுதலை பெற்றவர்களாய், வானகத்தந்தையின் இரக்கம்நிறை அன்பில் நுழைவதற்கு அழைக்கப்படுகின்றனர் என்றும் கூறிய திருத்தந்தை, இரக்கத்தின் யூபிலி ஆண்டிற்கும், மரியா, இரக்கத்தின் அன்னை என்பதற்கும் இடையேயுள்ள தொடர்பை விளக்கினார். மரியா, இரக்கத்தின் அன்னை, ஏனென்றால், அவர், தமது வயிற்றில், இயேசுவாம் இறை இரக்கத்தின் திருமுகத்தையே தாங்கியிருந்தார், நம் மீட்புக்காக மனித உரு எடுத்த இறைமகன், தம் தாயை நமக்குத் தாயாகக் கொடுத்திருக்கிறார், இத்தாய், இந்த வாழ்வுப் பயணத்தில் முழுவதும் நம்முடன் இணைகிறார், அதனால் நாம் தனித்து விடப்பட மாட்டோம், குறிப்பாக, நம் துன்ப மற்றும் நிச்சயமற்ற நேரங்களில் தனித்து விடப்பட மாட்டோம் என்றும் கூறினார் திருத்தந்தை பிரான்சிஸ். இந்த நவீன உலகில் மன்னிப்பு என்ற கருத்து தவறாகப் புரிந்துகொள்ளப்படுகின்றது, கிறிஸ்தவ வாழ்வில் இது இடராக உள்ளது என்றுரைத்த திருத்தந்தை, மன்னிக்க இயலாமல் இருப்பவர் அன்பின் முழுமையை இன்னும் உணராமல் இருக்கிறார், உண்மையாகவே அன்புகூர்பவரால் மட்டுமே மன்னிக்கவும் மறக்கவும் இயலும் என்றும் கூறினார். மன்னிப்பைத் தேடுபவர்க்கு அதை எப்படி வழங்குவது என்பதற்கு, மரியா திருஅவைக்கு எடுத்துக்காட்டாய் இருக்கிறார் என்றும், மன்னிப்பு, கல்வாரியில் வரையறையின்றி வழங்கப்பட்டதை, மன்னிப்பின் அன்னை, திருஅவைக்குக் கற்றுக் கொடுக்கிறார் என்றும் கூறினார் திருத்தந்தை பிரான்சிஸ். மன்னிப்பு, மகிழ்வுக்கும், இதய அமைதிக்கும் இட்டுச் செல்கின்றது, ஏனென்றால், இது, மரணத்தின் எண்ணங்களிலிருந்து இதயத்திற்கு விடுதலை அளிக்கின்றது, கோபமும் பழிவாங்கலும் இதயத்தைத் துன்புறுத்தி, மனத்தைக் காயப்படுத்துகின்றபோது, இதய அமைதியைப் பறித்துக்கொள்கின்றபோது மன்னிப்பு இதயத்திற்கு விடுதலை அளிக்கின்றது என்றும் கூறினார் திருத்தந்தை பிரான்சிஸ். ஆதாரம் : வத்திக்கான் வானொலி
See More
உலகின் அமைதிக்கு கிறிஸ்தவர்க்கும், முஸ்லிம்களுக்கும் அழைப்பு
இவ்வாண்டு கிறிஸ்து பிறப்பு விழாவும், மிலாடி நபி பண்டிகையும் அடுத்தடுத்து சிறப்பிக்கப்பட்டது, உலகில் அமைதியைக் கொண்டு வருவதற்கு கிறிஸ்தவர்களுக்கும், முஸ்லிம்களுக்கும் அழைப்பு விடுப்பதாய் அமைந்துள்ளது என்று நைஜர் நாட்டு ஆயர்கள் கூறியுள்ளனர். இறைவாக்கினர் முகமது அவர்களின் பிறப்பு விழாவான மிலாடி நபி பண்டிகை, இவ்வாண்டில், டிசம்பர் 24, கடந்த வியாழனன்று சிறப்பிக்கப்பட்டது குறித்து, தங்களின் கிறிஸ்மஸ் செய்தியில் குறிப்பிட்டுள்ள நைஜர் தலைநகர் Niamey பேராயர் Laurent Lompo, Maradi ஆயர் Ambroise Ouedraogo ஆகிய இருவரும் இவ்வாறு தெரிவித்துள்ளனர். அனைத்து விசுவாசிகளுக்கும் மூதாதையரான தந்தை ஆபிரகாமில் கொண்டிருக்கும் பொதுவான விசுவாசத்தின் பெயரில், உலகில் அமைதியைக் கொண்டு வருவதற்கு, இவ்விரு மதத்தவருக்கும் இவ்விழாக்கள் அழைப்பு விடுக்கின்றன என்று, இவ்விரு ஆயர்களும் கையெழுத்திட்டு வெளியிட்டுள்ள கிறிஸ்மஸ் செய்தி கூறுகிறது. அன்பு, மன்னிப்பு, ஒருவர் ஒருவரை மதித்தல், அமைதி, தேசிய ஒற்றுமை ஆகியவற்றில் வளர, கிறிஸ்தவர்க்கும், முஸ்லிம்களுக்கும் நைஜர் நாட்டின் விருதுவாக்கு அழைப்பு விடுப்பதாகவும் ஆயர்களின் கிறிஸ்மஸ் செய்தி கூறுகிறது 457 ஆண்டுகளுக்குப் பின்னர், கிறிஸ்து பிறப்பு விழாவும், மிலாடிநபி பண்டிகையும் இந்த 2015ம் ஆண்டில் அடுத்தடுத்து சிறப்பிக்கப்பட்டன. ஆதாரம் : Fides /வத்திக்கான் வானொலி
See More
இந்திய அரசுப் பள்ளிகளில் அனைத்து மதங்கள் படிப்புக்கு அழைப்பு
இந்தியாவில் கல்விப் பாடத்திட்டங்களில் இந்து மத மறைநூல் மட்டுமே சேர்க்கப்பட வேண்டும் என்பதற்கு அரசு முயற்சித்துவரும்வேளை, நாட்டின் அரசுப் பள்ளிகளில் அனைத்து மதங்கள் பற்றியும் படிப்பதற்கு வாய்ப்புகள் வழங்கப்படுமாறு இந்திய கத்தோலிக்கத் திருஅவை அழைப்பு விடுத்துள்ளது. விவிலியம், குரான் மற்றும் பிற மதங்களின் திருநூல்களிலிருந்து கற்றுக்கொள்வதற்கு வாய்ப்புகள் வழங்கப்பட வேண்டும் என்று கூறினார் போபால் பேராயர் லியோ கொர்னேலியோ. மேலும், கல்விப் பாடத்திட்டங்களில் அனைத்து மதங்களின் மறைநூல்களை இணைப்பது நன்மை பயக்கும் என்று, இந்திய கத்தோலிக்க ஆயர் பேரவையின் பேச்சாளர் அருள்பணி Gyanprakash Topno அவர்கள் கூறினார். மாணவர்கள் ஒரு மதத்தின் புத்தகத்தோடு ஒட்டிக்கொள்வதைவிட அனைத்து மதங்களின் மறைநூல்கள் பற்றி கற்றுக்கொள்ள வாய்ப்புகள் வழங்கப்பட வேண்டும் என்றும் கூறினார் அருள்பணி Gyanprakash. ஹரியானாவில் அடுத்த கல்வியாண்டில் 5ம் வகுப்பு முதல் 12ம் வகுப்பு வரை அரசுப் பள்ளிகளில் பகவத் கீதை கற்றுக்கொடுக்கப்படும் என்று பிஜேபி அரசு ஏற்கனவே அறிவித்துள்ளது. ஆதாரம் : UCAN/வத்திக்கான் வானொலி
See More
பிலிப்பைன்சில் பாதிக்கப்பட்டவர்களுக்கு திருத்தந்தை அனுதாபம்
தென் பிலிப்பைன்சின் மின்டனாவோ தீவில் இடம்பெற்ற சமய வன்முறையில் பாதிக்கப்பட்டுள்ள குடும்பங்களுக்கு தனது அனுதாபங்களைத் தெரிவித்துள்ளார் திருத்தந்தை பிரான்சிஸ். கிறிஸ்மஸ் திருவிழிப்பு நாளன்று இடம்பெற்ற தாக்குதல்களில் முஸ்லிம் புரட்சிக் குழு ஒன்று, ஒன்பது கிறிஸ்தவக் குடிமக்களைக் கொலை செய்ததையடுத்து சமய வன்முறை வெடித்துள்ளது. இவ்வன்முறையில் பாதிக்கப்பட்டுள்ள மக்களுக்கு தனது செபங்களைத் தெரிவித்துள்ளதுடன், உரையாடல், சகிப்புத்தன்மை மற்றும் அமைதிக்கு அழைப்பு விடுத்துள்ளார் திருத்தந்தை பிரான்சிஸ். மேலும், நைஜீரியாவில், எரிவாயு தொழிற்சாலையில் ஏற்பட்ட விபத்தில் பலியான மற்றும் பாதிக்கப்பட்டுள்ள மக்களுக்கு தனது செபங்களையும் அனுதாபங்களையும் தெரிவித்துள்ளார் திருத்தந்தை பிரான்சிஸ். திருத்தந்தை பிரான்சிஸ் அவர்களின் இச்செய்திகளை, திருப்பீடச் செயலர் கர்தினால் பியெத்ரோ பரோலின் அவர்கள், திருத்தந்தையின் பெயரில் இஞ்ஞாயிறன்று அந்நாடுகளுக்கு அனுப்பியுள்ளார். ஆதாரம் : வத்திக்கான் வானொலி
See More
Taizé குழும இளையோர்க்கு திருத்தந்தை வாழ்த்து
இரக்கத்தின் சிறப்பு யூபிலி ஆண்டில், கிறிஸ்தவர்கள், உடல் மற்றும் ஆன்மீகம் சார்ந்த இரக்கப் பணிகளில் ஈடுபடுமாறு பல நாடுகளின் இளையோரிடம் கேட்டுக்கொண்டுள்ளார் திருத்தந்தை பிரான்சிஸ். இஸ்பெயினின் வலென்சியா நகரில் டேஜே குழுமத்தின் 38வது ஐரோப்பிய கூட்டத்தில் கலந்துகொள்ளும் ஆயிரக்கணக்கான இளையோர்க்கு அனுப்பிய செய்தியில் இவ்வாறு கூறியுள்ளார் திருத்தந்தை பிரான்சிஸ். இரக்கம் என்ற தலைப்பு, இளையோர் அனைவரையும் ஒன்றுசேர்த்து, 2016ம் ஆண்டு முழுவதும் தன்னோடு மிக நெருக்கமாக வைத்திருக்கும் என்றும், இரக்கம் என்ற பண்பு வாழ்வின் சமூகத் தளங்களில் வெளிப்படுத்தப்பட வேண்டும் என்றும் கூறியுள்ளார் திருத்தந்தை பிரான்சிஸ். இச்செய்தியை, திருப்பீடச் செயலர் கர்தினால் பியெத்ரோ பரோலின் அவர்கள், திருத்தந்தை பிரான்சிஸ் அவர்களின் பெயரில் இஞ்ஞாயிறன்று அனுப்பியுள்ளார். திருஅவை, மனித சமுதாயத்திற்காக இருக்கின்றது, கிறிஸ்தவர்கள் இருக்குமிடத்தில் எந்தவொரு மனிதரும் இரக்கத்தின் பாலைவனச்சோலையைக் கண்டுகொள்ள வேண்டும், உங்களின் கிறிஸ்தவச் சமூகங்கள் இவ்வாறுதான் மாற வேண்டுமெனவும் அச்செய்தியில் கூறப்பட்டுள்ளது. ஆதாரம் : வத்திக்கான் வானொலி
See More
திருக்குடும்பம், நற்செய்தியின் ஓர் உண்மையான கல்விக்கூடம்
இயேசு, மரியா, யோசேப்பு ஆகிய மூவரைக் கொண்ட திருக்குடும்பம், ஒவ்வொரு விசுவாசிக்கும், குறிப்பாக, குடும்பங்களுக்கு நற்செய்தியின் ஓர் உண்மையான கல்விக்கூடம் என்று இஞ்ஞாயிறு மூவேளை செப உரையில் கூறினார் திருத்தந்தை பிரான்சிஸ். திருக்குடும்ப விழாவான இஞ்ஞாயிறு நண்பகலில் வத்திக்கான் தூய பேதுரு வளாகத்தில் கூடியிருந்த பல்லாயிரக்கணக்கான மக்களுக்கு மூவேளை செப உரை வழங்கிய திருத்தந்தை பிரான்சிஸ் அவர்கள், ஒவ்வொரு குடும்பமும், திருக்குடும்பத்தின் எடுத்துக்காட்டான மற்றும் சான்று வாழ்விலிருந்து, மதிப்புமிக்க வழிகாட்டுதலைப் பெற முடியும் என்று கூறினார். குடும்பத்தை, வாழ்வு மற்றும் அன்பின் சிறப்புக் குழுவாக அமைப்பதற்கு இறைவன் வகுத்துள்ள திட்டம் நிறைவேறுவதை திருக்குடும்பத்தில் நாம் கண்டு வியக்கிறோம், இவ்வாறு ஒவ்வொரு கிறிஸ்தவக் குடும்பமும், இல்லத் திருஅவையாக வாழ்வதற்கு, திருக்குடும்பத்திலிருந்து கற்றுக்கொள்கின்றது என்றும் கூறினார் திருத்தந்தை பிரான்சிஸ். கிறிஸ்தவக் குடும்பங்கள், பல்வேறு சூழல்களில் புரிந்துகொள்ளாமை மற்றும் இன்னல்களை எதிர்கொள்ளும் இக்காலத்தில், குடும்பத்தின் மதிப்பு பற்றிய சிந்தனைகளை வழங்கிய திருத்தந்தை, குழந்தை, இறைவனின் கொடையாக வரவேற்பதற்கு, நம் அன்னை மரியாவும் யோசேப்பும் நமக்குக் கற்றுத் தருகின்றனர் என்றும் கூறினார். ஒன்றிணைந்த குடும்பங்களில், சிறார் தங்களின் வாழ்வை, முழு பக்குவமடைந்த நிலைக்கும், அர்த்தமுடன் வாழ்வதற்கும், அன்பைச் சுதந்திரமாகக் கொடுப்பதற்கும் பெறுவதற்கும், கனிவு, ஒருவர் ஒருவரை மதித்தல், புரிந்துகொள்ளல், மன்னிப்பு, மகிழ்வு ஆகியவற்றில் வளர்வதற்கும் கற்றுக் கொள்கின்றனர் என்றும் கூறினார் திருத்தந்தை பிரான்சிஸ். மேலும், இம்மூவேளை செப உரைக்கு முன்னர் குடும்பங்களை வாழ்த்திப் பாடிய சிறார் குழுவுக்குத் தனது நன்றியையும் தெரிவித்தார் திருத்தந்தை. ஆதாரம் : வத்திக்கான் வானொலி
See More