உங்களுக்குத் தெரியுமா ?
வேரித்தாஸ் நிகழ்ச்சிகளை டிஜிட்டல் தொழில் நுட்பத்தில் 24 மணிநேரமும், 7 நாட்களிலும் இணையத்தளத்திலும் அன்ராய்டு மொபைலிலும் கேட்கலாம். அன்ராய்டு மொபைல் பயன்பாட்டினைப் பதிவிறக்கம் செய்ய RVA MOBILEஎன டைப் செய்யவும்

திருச்சபை செய்திகள்

எங்கும் பணியாற்ற எப்போதும் தயாராக இருத்தல்
தான் பணியாற்றும் இடத்திலிருந்து இன்னொரு இடத்திற்கு செல்ல எப்போதும் தயாராக இருப்பவராக ஒரு அருள்பணியாளர் இருக்கவேண்டும், ஏனெனில் வரலாற்றின் மையம் அவரல்ல என்றும், அவர் சுதந்திரமானவர் என்பதை அவர் அறிவார் என்றும் கூறினார் திருத்தந்தை பிரான்சிஸ். தான் தங்கியிருக்கும் சாந்தா மார்த்தா இல்லத்தின் சிற்றாலயத்தில் திருப்பலி நிறைவேற்றி மறையுரை வழங்கிய திருத்தந்தை பிரான்சிஸ் அவர்கள், எந்த தீமைகளோடும் உடன்பாடு கொள்ளாமல், இறைவன் அனுப்பும் இடத்திற்கு பணியாற்றச்செல்ல தான் எப்போதும் தயாராக இருக்க வேண்டும் என்று, தன் மந்தையிடமிருந்து தனக்கான எவ்வித எதிர்பார்ப்புமின்றி வாழும் சுதந்திர மனிதராகிய மேய்ப்பருக்குத் தெரியும் என உரைத்தார். இச்செவ்வாய்க்கிழமை திருப்பலியின் முதல் வாசகமாகிய, திருத்தூதர் பணிகள் நூலில், புனித பவுல், தூய ஆவியாரின் கட்டளைக்கிணங்க தான் எருசலேமுக்குச் செல்வதாக கூறியதை தன் மறையுரையில் சுட்டிக்காட்டியத் திருத்தந்தை, ஒவ்வொரு மேய்ப்பரின் பணியும் எப்போதும் முழுமையடைந்ததாக இருக்கவேண்டும், பாதியில் விட்டுச் செல்வதாக அல்ல, என்றார். மந்தையுடன் ஒரு மேய்ப்பர் கொள்ளும் பிணைப்பு, இயேசுவின் சிலுவையால் சுத்திகரிக்கப்பட்டதாக இருக்கும்போது, அதனை விட்டுவிட்டு மற்றொரு இடத்திற்கு பணியாற்றச் செல்வது, இலகுவானதாக இருக்கும் என்றார் திருத்தந்தை பிரான்சிஸ். எந்த ஒரு மேய்ப்பரும், தீயவைகளோடு உடன்பாடு கொள்ளாதவராகவும், அனுப்பப்படும் இடங்களுக்கு எவ்வித கேள்வியும் இன்றி கீழ்ப்படிதலுடன் செல்பவராகவும், தன் வாழ்வுக்கு முக்கியத்துவம் தராதவராகவும் செயல்படவேண்டும் என மூன்று விதிகளை தன் மறையுரையில் முன்வைத்த திருத்தந்தை பிரான்சிஸ் அவர்கள், நம் மேய்ப்பர்களாகிய அருள்பணியாளர்கள், ஆயர்கள், திருத்தந்தை என அனைவருக்காகவும் செபிப்போம் எனவும் கேட்டுக்கொண்டார். ஆதாரம் : வத்திக்கான் வானொலி
See More
நேர் மறை எண்ணங்கள் விதைக்கப்படுவது, இன்றியமையாதது
சமூகத் தொடர்புத்துறை, நேர்மறை எண்ணங்களை அதிகம் அதிகமாக பரப்பவேண்டும் என திருத்தந்தை பிரான்சிஸ் அவர்கள் தொடர்ந்து அழைப்பு விடுத்துவருவதை ஒவ்வொருவரும் பின்பற்ற வேண்டும் என அழைப்பு விடுத்துள்ளார், பாகிஸ்தான் நாட்டின் வானொலி நிலைய இயக்குனர் ஒருவர். இன்றைய உலகில் கொலைகளும் பயங்கரவாதங்களும் குறித்த செய்திகளே, தகவல் துறையில் முதலிடத்தை வகிக்கின்றன, வளர்ச்சி மற்றும் நற்செயல்கள் குறித்தவை பின்னுக்குத் தள்ளப்படுகின்றன என்று கூறிய, பாகிஸ்தான் வானொலி நிலைய இயக்குனர் Syed Khalid Waqar அவர்கள், அனைத்து நிகழ்வுகளும் வியாபார கண்ணோட்டதில் நோக்கப்பட்டு, குண்டுவீச்சு தாக்குதல்கள்கூட, இலாபம் தரும் செய்திகளாக மாறும்போது, சமூக மதிப்பீடுகள் அழிக்கப்பட்டு, எதிர்மறை எண்ணங்கள் மக்களின் மனங்களில் உருவாக காரணமாகிறது என்றார். பாகிஸ்தான் கத்தோலிக்கர்களால் இலாகூரில் ஏற்பாடுச் செய்யப்பட்ட சமுகத் தொடர்பு நாள் குறித்த கருத்தரங்கில் கலந்துகொண்டு உரையாற்றிய இஸ்லாமியரான Khalid Waqar அவர்கள், திருத்தந்தை காட்டும் வழியில் நேர் மறை எண்ணங்களை விதைப்பது, ஒவ்வொரு சமுதாயத்திற்கும் இன்றியமையாதது எனவும் கூறினார். ஆதாரம் : வத்திக்கான் வானொலி
See More
செபத்தில் பரிந்துரைப்பது, பிறரன்பு நடவடிக்கை
அனைத்தையும் இறைவனிடம் கொணர்ந்து அவரின் பாதுகாப்பில் ஒப்படைப்பதை நோக்கம் கொண்டுள்ளதால், செபம் என்ற பரிந்துரையானது, அமைதியை அல்ல, மாறாக, பிறரன்பை உள்ளடக்கியதாக உள்ளது என இத்தாலியின் ஜெனோவா நகரில் இச்சனிக்கிழமை மாலை திருப்பலியில் மறையுரையாற்றினார், திருத்தந்தை பிரான்சிஸ். தன் விண்ணேற்பின் வழியாக விண்ணையும் மண்ணையும் இணைத்த இறைவன் இயேசு, நமக்காக சோர்வின்றி, தந்தையிடம் பரிந்து பேசிக்கொண்டிருக்கிறார் என்பதை எடுத்துரைத்த திருத்தந்தை, அதேபோல் கிறிஸ்தவர்களும் மற்றவர்களுக்காக பரிந்து பேசுவதை செபத்தில் உள்ளடக்கும்போது, அது பிறரன்பு செயலாகிறது என்றார். ஜெனோவாவின் கென்னடி சதுக்கத்தில் திருப்பலி நிறைவேற்றுவதற்கு முன்னர் அந்நகரின் ஜியான்னினா கஸ்லினி மருத்துவ மனையில் சிறார்களை சந்தித்து அவர்களோடு உரையாடிய திருத்தந்தை பிரான்சிஸ் அவர்கள், அங்கு பணியாற்றுவோரிடமும், பிறரன்பின் முக்கியத்துவம் குறித்து எடுத்தரைத்தார். கடலை நோக்கியிருந்த கென்னடி வளாகத்தில் திருப்பலி நிறைவேற்றி மறையுரை வழங்கிய திருத்தந்தை, நமக்காகப் பரிந்துரைத்துக் கொண்டிருக்கும் இயேசு, நாம் குறையுடையவர்களாக இருப்பினும் நம் மீது நம்பிக்கை வைத்து, அவர் பணியை தொடர்ந்து நடத்த நம்மை அனுப்பி வைக்கிறார் என்றார். இறைவனின் பலத்தில் நம்பிக்கை வைத்து, தூய ஆவியார் வழங்கும் வல்லமையின் துணைகொண்டு நாம் நற்செய்தியை உலகிற்கு எடுத்துச்செல்ல வேண்டும் என்பதையும் வலியுறுத்திய திருத்தந்தை பிரான்சிஸ் அவர்கள், நற்செய்தியை எடுத்துரைக்காமல் சோம்பித் திரிவது கிறிஸ்தவரால் இயலாது எனவும் கூறினார். ஆதாரம் : வத்திக்கான் வானொலி
See More
நற்செய்தியை அறிவிப்பது கடமை மட்டுமல்ல, கௌரவமும்கூட‌
மனித குலமனைத்தும் நற்செய்தியைப் பெறவேண்டும் என்ற நோக்குடன் செயலாற்றுவதே, ஒவ்வொரு கிறிஸ்தவருக்கும் இருக்கும் கடமை, மற்றும் உயரிய அங்கீகாரம் என இஞ்ஞாயிறு அல்லேலூயா வாழ்த்தொலி உரையில் எடுத்துரைத்தார் திருத்தந்தை பிரான்சிஸ். அல்லேயா வாழ்த்தொலி உரைக்கு செவிமடுக்க வத்திக்கானின் தூய பேதுரு பேராலய வளாகத்தில் இஞ்ஞாயிறு கூடியிருந்த மக்களுக்கு, இயேசு, விண்ணகத்திற்கு எழுந்துசென்ற திருவிழாவின் மையப்பொருளுடன் உரையாற்றிய திருத்தந்தை, இயேசு கிறிஸ்துவின் அன்பையும் அக்கறையையும் மனித குலத்திற்கு அறிவிக்க வேண்டியது நம்மை சார்ந்துள்ளது, எனினும், அதற்கு தூய ஆவியாரின் துணை இன்றியமையாதது எனவும் எடுத்துரைத்தார். முதன்முதலில் சீடர்களை அழைத்து ஒரு சிறிய குடும்பமாக உருவாக்கிய அந்த கலிலேயாவிலிருந்து இயேசு விண்ணகம் ஏறிச் சென்றார் என்பதை நினைவூட்டிய திருத்தந்தை பிரான்சிஸ் அவர்கள், தந்தை வழங்கிய பணியை இயேசு நிறைவுக்குக் கொணர்ந்துள்ள இந்த விண்ணேற்பு நேரத்தில்தான், நற்செய்தியை உலகுக்கு எடுத்துச் செல்லும் நம் பணி துவங்குகின்றது எனவும் கூறினார். பாடுகளையும் மரணத்தையும் கண்டதால் அச்சத்திலிருந்த சீடர் கூட்டத்திடமே நற்செய்தி அறிவிக்கும் பணியை விட்டுச்செல்கிறார் இயேசு, ஏனெனில் இவ்வுலகில் இனிமேல் இயேசுவின் பணியை தொடர்ந்து எடுத்துச் செல்லவேண்டியவர்கள் அவரின் சீடர்களே எனவும் உரைத்தார் திருத்தந்தை. உயிர்த்த இயேசுவின் துணைகொண்டும், தூய ஆவியாரின் வழிகாட்டுதலுடனும் நற்செய்தியை உலகின் எல்லை வரை, உலகம் முடியும் வரை எடுத்துச் செல்லவேண்டிய கிறிஸ்தவர்களின் கடமையையும் வலியுறுத்தினார், திருத்தந்தை பிரான்சிஸ். ஆதாரம் : வத்திக்கான் வானொலி
See More
திருத்தந்தையுடன் கானடா பிரதமர்
இத்திங்களன்று காலை, கானடா பிரதமர் Justin Trudeau அவர்கள், திருத்தந்தையை திருப்பீடத்தில் சந்தித்து உரையாடினார். தன் மனைவி Sophie Gregoire-Trudeau அவர்களுடனும், அரசு உயர் மட்ட குழுவினருடனும், திங்களன்று காலை நண்பகல் 12 மணி 45 நிமிடங்களுக்கு திருப்பீடம் வந்த கானடா பிரதமர், திருத்தந்தையை தனியாக சந்தித்து உரையாடி, பின்னர் திருத்தந்தையுடன், தனியாகவும், தன் மனைவியுடனும், அரசுக் குழுவினருடனும் புகைப்படங்களும் எடுத்துக்கொண்டார். திருத்தந்தையுடன் இடம்பெற்ற சந்திப்புக்குப் பின்னர், திருப்பீடச் செயலர் கர்தினால் பியத்ரோ பரோலின் அவர்களையும், பன்னாட்டு உறவுகள் திருப்பீடத் துறையின் செயலர் பேராயர் பால் ரிச்சர்ட் காலகர் அவர்களையும் சந்தித்து உரையாடினார், கானடா பிரதமர் Justin Trudeau . கானடா பூர்வீக இன மக்களுக்குரிய பணிகள், தட்பவெப்ப நிலை மாற்றங்கள் குறித்தவற்றில் ஒன்றிணைந்து போராடுதல், மத மற்றும் கலாச்சார பன்முகத்தன்மை போன்ற விவகாரங்கள், இந்த சந்திப்பின்போது விவாதிக்கப்பட்டதாக அறிவிக்கப்பட்டுள்ளது. ஆதாரம் : வத்திக்கான் வானொலி
See More
தூய ஆவியானவர் நமக்குள் இயங்க அனுமதிப்போம்
எந்த ஒரு தீர்மானத்தையும் எடுப்பதற்கு முன்னால், தூய ஆவியானவரை நம் மனதிற்குள் நுழைய அனுமதித்து, அவர் குரலுக்கு செவிமடுக்கப் பழகுவோம் என அழைப்பு விடுத்தார், திருத்தந்தை பிரான்சிஸ். தான் தங்கியிருக்கும் சாந்தா மார்த்தா இல்லத்தின் சிற்றாலயத்தில் இத்திங்கள் காலை திருப்பலி நிறைவேற்றி மறையுரை வழங்கிய திருத்தந்தை, வரும் ஞாயிறு சிறப்பிக்கப்படவிருக்கும் தூய ஆவியார் பெருவிழாவை மையமாக வைத்து, தன் கருத்துக்களைப் பகிர்ந்து கொண்டார். நம் இதயங்களை, நன்மையை நோக்கித் திருப்புபவராகவும், நமக்குத் தூண்டுதல் அளிப்பவராகவும், நம் உள்ளுணர்வுகளைத் தட்டியெழுப்புபவராகவும் இருக்கும் தூய ஆவியானவர், நம் இதயங்களிலும், பங்குத்தளங்களிலும், சமூகங்களிலும் குடிவரவேண்டும் என செபிப்போம் எனவும் அழைப்புவிடுத்தார் திருத்தந்தை. நம் வாழ்வில் தூய ஆவியானவருக்கு நாம் எந்த இடத்தைக் கொடுத்துள்ளோம் என்பதைக் குறித்து நாம் சிந்திக்க வேண்டும் என்ற அழைப்பையும் முன்வைத்த திருத்தந்தை, தூய ஆவியாரின் ஆலோசனைகளுக்கு செவிமடுக்காமல், வெறும் கொள்கையளவில் தொடரும் விசுவாசம் என்பது, கதகதப்பில்லாத குளிர்நிலை விசுவாசமாக மாறிவிடும் ஆபத்தையும் சுட்டிக்காட்டினார். எல்லாச் சட்டங்களையும் தெளிவாகப் படித்திருந்தும், தங்கள் இதயங்களை இறுக்கமாக மூடிச் செயல்பட்ட அக்கால யூத மறைவல்லுனர்களைப்போல் மாறாமல் இருக்க வேண்டுமானால், தூய ஆவியாரை நமக்குள் இயங்க அனுமதிக்க வேண்டியது மிகவும் அவசியம் என்பதையும் சுட்டிக்காட்டினார் திருத்தந்தை பிரான்சிஸ். ஆதாரம் : வத்திக்கான் வானொலி
See More
கடற்கரை அரிப்பினால் குறிப்பிடத்தக்க நிலச்சரிவு ஆபத்துக்கள்
ரொறொன்ரோ மற்றும் பிராந்திய பாதுகாப்பு ஆணையம் ஸ்காபுரோ பிளவ்சின் மேல் மற்றும் அடித்தளங்களை விட்டு விலகி இருக்குமாறு பார்க் பாவனையாளர்களை எச்சரிக்கின்றது. இந்த வருடம் இடம்பெற்ற “குறிப்பிடத்தக்க” பல நிலச்சரிவுகளே இதற்கு காரணமாகும். ஏப்ரல் மே மாதங்களில் கிட்டத்தட்ட 15- நிலச்சரிவுகள் இடம்பெற்றுள்ளதாகவும் பொதுவாக ஒவ்வொரு இரண்டு வருடங்களில் குறைந்தது ஒரு சிறிய அளவு இடம்பெற்றுள்ளதாகவும் ஆணையம் தெரிவித்துள்ளது. பலத்த மழை மற்றும் லேக் ஒன்ராறியோவின் நீர்மட்ட அதிகரிப்பு காரணமாக குன்றுகளிலிருந்து துண்டுகள் விழுவதுடன் தண்ணீருக்கு அருகாமையில் உள்ள பார்க்கின் வழிகளையும் அரிக்கின்றன. இந்த மாதம் ரொறொன்ரோ நகரமும் TRCA ஆணைய பணியாளர்களும் கில்ட் கட்டுமான அணுகல் பாதை மற்றும் டொரிஸ் மக்கார்தி அடிச்சுவட்டையும் பொது அணுகல்களிற்கு தடை செய்தனர். இப்பகுதியின் பாதுகாப்பை மேம்படுத்தும் முயற்சி குறித்து ஆய்வுகள் இடம்பெறுவதாக தெரிவிக்கப்பட்டுள்ளது. அண்மைக்கால மழை பொழிவினால் கடற்கரை அரிப்பு குறித்து பார்க் பாவனையாளர்கள் எச்சரிக்கப்பட்டுள்ளனர். கணிக்க முடியாத நீர் மட்டம் காணப்படுவதால் இக்கால கட்டத்தில் நீர்மட்டத்தை விட்டு விலகி இருப்பது பாதுகாப்பானதாகும். காற்றும் அலைகளும் எப்போது செயற்படும் என்பது தெரியாது என கூறப்படுகின்றது.
See More
தென் கொரிய புதிய அரசுத்தலைவர் திருத்தந்தைக்கு வாழ்த்து
தென் கொரியாவின் புதிய அரசுத்தலைவர் மூன் ஜே-இன் (Moon Jae-in) அவர்கள், திருத்தந்தை பிரான்சிஸ் அவர்களுக்கு, தன் வாழ்த்துக்கள் அடங்கிய செய்தியை, ஒரு சிறப்புத் தூதர் வழியாக வழங்கியுள்ளார். வத்திக்கான் தூய பேதுரு வளாகத்தில், மே 24, இப்புதனன்று நடைபெற்ற பொதுமறைக்கல்வியுரையில், திருப்பீடத்துக்கான தென் கொரியத் தூதர் Seong Youm, தென் கொரிய ஆயர் பேரவைத் தலைவர் பேராயர் Hyginius Kim Hee-jong ஆகிய இருவரும் கலந்துகொண்டு, அரசுத்தலைவர் மூன் ஜே-இன் அவர்களின் வாழ்த்துச் செய்தியை திருத்தந்தையிடம் அளித்தனர். அமைதி, நீதி, ஒப்புரவு ஆகியவற்றுக்கு, திருத்தந்தை ஆற்றிவரும் நற்பணிகளுக்கு, அரசுத்தலைவர் மூன் ஜே-இன் அவர்கள் தன் சிறப்புப் பாராட்டுக்களை, அச்செய்தியில் தெரிவித்துள்ளார். 1947ம் ஆண்டு, ஜப்பானிய ஆதிக்கத்திலிருந்து கொரியா விடுதலை பெற்றதும், திருத்தந்தை 12ம் பத்திநாதர் அவர்கள், அந்நாட்டிற்கு, திருப்பீடத்தின் தூதராக, அருள்பணி Patrick James Byrne அவர்களை அனுப்பியதன் வழியே, கொரியாவை ஒரு தனி நாடாக, திருப்பீடம் ஏற்றுக்கொண்டது. 1948ம் ஆண்டு திருப்பீடம் மேற்கொண்ட முயற்சிகளால், பல கத்தோலிக்க நாடுகள், கொரியாவை, தனி நாடாக ஏற்றுக்கொள்ள முன்வந்தன என்பது குறிப்பிடத்தக்கது. இதற்கிடையே, தென் கொரியாவில், குடியேற்றதாரர் பாதுகாக்கப்படவும், இனப்பாகுபாடு தடை செய்யப்படவும், புதிய அரசு நடவடிக்கை எடுக்க வேண்டும் என, அந்நாட்டின் பல்சமய குழு ஒன்று, விண்ணப்பித்துள்ளது. ஆதாரம் : வத்திக்கான் வானொலி
See More
காப்டிக் கிறிஸ்தவர்கள் கொல்லப்பட்டதற்கு திருத்தந்தை இரங்கல்
“இடர்களை எதிர்கொள்ளும் நேரங்களில் நாம் கடவுளை மறந்தாலும்கூட, அவர் நம்மோடு எப்போதும் துணை நிற்கிறார்” என்ற வார்த்தைகள், திருத்தந்தை பிரான்சிஸ் அவர்களின் டுவிட்டரில், இச்சனிக்கிழமையன்று வெளியாயின. மேலும், எகிப்தில், காப்டிக் வழிபாட்டுமுறை கிறிஸ்தவர்கள், பயங்கரவாதத் தாக்குதலில், கொல்லப்பட்டது குறித்து, தனது ஆழ்ந்த அனுதாபத்தை வெளியிட்டுள்ள அதேவேளை, இக்கொலைகள், வெறுப்பின் அறிவற்ற செயல் என, தனது வன்மையான கண்டனத்தையும் தெரிவித்துள்ளார், திருத்தந்தை பிரான்சிஸ். திருத்தந்தையின் இந்த அனுதாபத்தை, தந்திச் செய்தியாக, திருப்பீடச் செயலர் கர்தினால் பியெத்ரோ பரோலின் அவர்கள், எகிப்து அரசுத்தலைவர், Abdul Fattah al-Sisi அவர்களுக்கு அனுப்பியுள்ளார். எகிப்து தலைநகர் கெய்ரோவிலிருந்து, ஏறக்குறைய, 140 கிலோ மீட்டர் தூரத்திலுள்ள, புனித சாமுவேல் துறவு மடத்திற்கு, திருப்பயணம் மேற்கொண்ட கிறிஸ்தவர்கள் சென்ற பேருந்தை, துப்பாக்கிகளுடன் வந்த ஏறக்குறைய பத்து மனிதர்கள் சுட்டதில், குறைந்தது 28 பேர் கொல்லப்பட்டனர், மற்றும், ஏறக்குறைய 23 பேர் காயமடைந்தனர். இவர்களில் பெரும்பாலானவர்கள் பெண்களும், சிறாரும். இப்பயங்கரவாதத் தாக்குதலில் பலியானவர்கள் மற்றும், காயமடைந்தவர்களுக்கும், அவர்களின் குடும்பங்களுக்கும், தனது செபங்களையும், ஒருமைப்பாட்டுணர்வையும் தெரிவித்துள்ள திருத்தந்தை, எகிப்தில் அமைதியும் ஒப்புரவும் ஏற்படுவதற்கு, தான் செபிப்பதாகவும் கூறியுள்ளார். இதற்கிடையே, இப்பயங்கரவாதத் தாக்குதலுக்குப் பதிலடி கொடுக்கும் விதமாக, எகிப்து இராணுவம், பயங்கரவாதிகளின் பயிற்சி முகாம்களைத் தாக்கியுள்ளது என, எகிப்து அரசுத்தலைவர் Abdul Fattah al-Sisi அவர்கள் கூறியுள்ளார். ஆதாரம் : வத்திக்கான் வானொலி
See More
இயேசுவின் வாழ்வுமுறையைப் பின்பற்றுவதே, ஆன்மீக வாழ்வுக்கு..
இச்சனிக்கிழமை காலை பத்து மணியளவில், திருத்தந்தை பிரான்சிஸ் அவர்கள், ஜெனோவா, புனித இலாரன்ஸ் பேராலயத்தில், ஆயர்கள், அருள்பணியாளர்கள், குருத்துவமாணவர்கள், இருபால் துறவியர், மற்றும், மேய்ப்புப்பணியில் உதவிபுரியும் பொதுநிலையினரைச் சந்தித்து, அவர்கள் கேட்ட கேள்விகளுக்குப் பதில் அளித்தார். திருத்தந்தை பேராலயத்தில் நுழைந்தபோது, கரவொலியுடன் கூடிய ஆரவார வரவேற்பு, அவருக்கு அளிக்கப்பட்டது. ஜெனோவா பேராயர் கர்தினால் ஆஞ்சலோ பஞ்ஞாஸ்கோ அவர்கள் திருத்தந்தையை வரவேற்றுப் பேசினார். முதலில் சிறிதுநேரம் செபித்தபின், அங்குக் கூடியிருந்த எல்லாரிடமும், எகிப்து நாட்டு காப்டிக் கிறிஸ்தவர்களுக்காக, என்னோடு இணைந்து, அருள்நிறைந்த மரியே என்ற செபத்தைச் செபியுங்கள், இந்த நம் சகோதரர்கள், தங்களின் விசுவாசத்தை மறுதலிக்காமல் இருப்பதற்காகக் கொலை செய்யப்பட்டுள்ளனர் என்று கூறி, அச்செபத்தைச் செபித்தார், திருத்தந்தை பிரான்சிஸ். இரு பங்குத்தந்தையர், லிகூரே அருள்சகோதரிகள் அமைப்பின் தலைவர், கப்புச்சின் துறவு சபை அருள்பணியாளர் ஒருவர் ஆகிய நால்வர் கேட்ட கேள்விகள், ஒவ்வொன்றிற்கும் பதில் அளித்தார் திருத்தந்தை. இந்நவீன காலத்தில் ஆழமான ஆன்மீக வாழ்வை எவ்வாறு வாழ்வது எனக் கேட்ட பங்குத்தந்தையின் கேள்விக்குப் பதிலளித்த திருத்தந்தை, இயேசுவின் எடுத்துக்காட்டைப் பின்பற்றினால், நம் மேய்ப்புப்பணியை சிறப்பாக ஆற்றமுடியும், இயேசுவின் வாழ்வுமுறையைப் பின்பற்றுவதே, ஆழமான ஆன்மீக வாழ்வுக்கு அடிப்படையாகும் என்றார். இயேசு தொடர்ந்து பயணம் செய்து கொண்டிருந்தார், பெரும்பாலான நேரங்களில் அவர் தெருக்களில் இருந்தார், மக்கள் மத்தியில் இருந்தார், மக்கள் பிரச்சனைகளை எதிர்கொண்டபோது அவர்களுக்கு நெருக்கமாக இருந்தார் என்றுரைத்தத் திருத்தந்தை, இயேசு, தம் தந்தையைச் சந்தித்தது, மக்களைச் சந்தித்தது ஆகிய இரு தருணங்கள் பற்றி நற்செய்தியில் வாசிக்கிறோம் எனக் கூறினார். அருள்பணியாளர், திருப்பலியில் கடவுளை, இயேசுவை, மக்களைச் சந்திக்கிறார் என்றும், அருள்பணியாளர் செபிக்க வேண்டியதன் முக்கியத்துவம் குறித்தும் விளக்கிய திருத்தந்தை பிரான்சிஸ் அவர்கள், புறங்கூறுதல், குழுவாழ்வைச் சிதைக்கும் எனவும் எச்சரித்தார். இச்சந்திப்பு முடிந்து, பாதுகாவலர் அன்னை மரி திருத்தலத்தில் இளையோரைச் சந்தித்தார் திருத்தந்தை. பின், அத்திருத்தலப் பகுதியில், ஏழைகள், வீடற்றவர் மற்றும் கைதிகளுடன் மதிய உணவருந்தினார், திருத்தந்தை பிரான்சிஸ். ஆதாரம் : வத்திக்கான் வானொலி
See More